تەرازووی پێداچوونەوە بۆ بەغدا نێردرا؛ لیستی مووچە و داهاتی ناوخۆ لە ئامادەکردن دان

ئاڤا نیوز

هەوڵەکان بۆ ئامادەکردنی لیستی مووچەی مانگی پێنج بەردەوامن و حکومەتی هەرێمی کوردستان مەبەستییەتی پێش جەژن مووچەی مانگی پێنج دابەش بکرێت، بۆ ئەم مەبەستەش داوا لە سەرجەم وەزارەت و فەرمانگە و دەستەکان کراوە پەلە بکەن لە ئامادەکردنی لیست. ئاڤا زانیویەتی لە دوو بۆ سێ ڕۆژی داهاتوودا لیستی مووچە ئامادە دەکرێت.

وێنە گەورەکە: حکومەتی هەرێمی کوردستان یەکەم ئەرکی خۆی بەرامبەر بەغدا جێبەجێ کرد، ئەویش تەرازووی پێداچوونەوە - میزان مراجەعەیە و لە ڕۆژی پێنجشەممە 15ـی ئەم مانگەوە نێردراوە. هەروەها یەکە ژمێریارییەکانی سەرجەم وەزارەت و فەرمانگە و دەستەکان ئاگادارکراونەتەوە بەخێرایی لیستی مووچەی مانگی پێنج بە سیستمی پەیرۆڵ ئامادە بکەن و بۆ وەزارەتی بنێرن.

زانیاریی بەدەستهاتوو: وەزارەتی دارایی کوردستان دەیەوێت دوای کۆکردنەوە و وردبینی لە لیستی مووچەی وەزارەتەکان، بە چەند ڕۆژێکی کەم لیستەکە بۆ وەزارەتی دارایی عێراق بنێرێت.

ئەرکی سێیەمی هەرێمی کوردستان ناردنی داهاتی ناوخۆیە، کۆکردنەوەی داهات و ئامادەکردنی ڕاپۆرتی داهاتی ناوخۆی مانگی ڕابردوو دەستی پێکردووە. هەوڵ دەدرێت ئەم هەفتەیە ئەویش ئامادە بکرێت. کۆتایی ئەم هەفتەیە یان سەرەتای هەفتەی داهاتوو لەگەڵ لیستی مووچە بۆ بەغدا بنێردرێت و پشکی بەغداش بە کاش بخرێتە سەر هەژماری بانکییەکەیان لە لقی هەولێری بانکی ناوەندی.

لەلایەکی دیکەوە: بڕیارە لەم هەفتەیە تیمێکی تەکنیکی وەزارەتی دارایی عێراق بێنە هەولێر و لەگەڵ وەزارەتی دارایی کوردستان و فەرمانگەی تەکنەلۆژیای زانیاری لیستی مووچەی مانگی پێنج تەواو بکەن، لەگەڵ وردبینیکردن لە داهاتی ناوخۆ. دواتریش لیستەکە لەگەڵ خۆیان ببەنەوە بۆ بەغدا.

لێدوانی فەرمی: سەرچاوەیەک لە وەزارەتی دارایی بە ئاڤای گوت، "ئەگەر تیمەکەی بە‌غدا ئەم هەفتەیە نەیەنە هەولێر، تیمێکی تەکنیکی کوردستان لە ڕۆژانی داهاتوودا سەردانی بەغدا دەکەن، لیستی مووچەی مانگی پێنجیش لەگەڵ خۆیان دەبەن و ڕادەستی بەغدای دەکەن."