ترەمپ: نەبمەوە سەرۆک گۆمی خوێن هەڵدەستێت

ئاڤا نیوز 

 

دۆناڵد ترەمپ، سەرۆکی پێشووی ئەمریکا و کاندیدی کۆمارییەکان بۆ سەرۆکایەتیی ئەمریکا ڕایگەیاند، هەڵبژاردنەکانی ئەمساڵی سەرۆکایەتیی ئەمریکا گۆڕانکاری لە مێژووی وڵاتەکەدا دروست دەکات. ڕاشیگەیاند، "ئەم هەڵبژاردنە من نەبمەوە سەرۆک گۆمی خوێن هەڵدەستێت و دیموکراسی لە وڵاتدا نامێنێت".

 

وێنە گەورەکە: دوای چوار ڕۆژ لە مسۆگەرکردنی کاندیدبوونی بۆ سەرۆکایەتیی ئەمریکا لەلایەن کۆمارییەکانەوە، ترەمپ لە ویلایەتی ئۆهایۆ قسەی بۆ لایەنگرانی کرد و گوتی: پێنجی نۆڤەمبەری ئەمساڵ گرنگترین ڕۆژ دەبێت لە مێژووی ئەمریکا".

 

لێدوانی فەرمی: ترەمپ گوتی: ئەگەر ئەمجارە من نەبمەوە بە سەرۆکی ئەمریکا و لای سەرۆکی ئێستا (جۆ بایدن) بمێنێتەوە، ئەوا "گۆمی خوێن" لە ئابووریی وڵات ڕوودەدات.

 

ئەو مانایەی دەیگەیەنێت: سەرۆکی پێشووی ئەمریکا دەقاودەق مەبەستی ئەوە نەبوو کە لە وڵاتەکەیدا شەڕ هەڵدەگیرسێت لە ئەگەری ئەوەی ئەو نەبێتەوە بە سەرۆک، بەڵکو مەبەستی ئەوە بوو هۆشدارییەک بگەیێنێت بە لایەنگرانی و خەڵکی ئەمریکا ئەویش ئەوە بوو کە گوزەرانی خەڵکی وڵاتەکەی بەرەو "خراپی" دەڕوات. 

هەنگاوی داهاتوو: قسەکانی ترەمپ لەبارەی ئەو ئاڵۆزیی و کێشانەی ئێستایە کە لە ئەمرکا لەسەر پیشەسازی ئۆتۆمبێل دروستبووە و ترەمپ دەڵێت، بۆ ئەوەی ئۆتۆمبێلی ناوخۆ بفرۆشرێت، باج بەڕێژەی 100% دەخاتە سەر ئەو ئۆتۆمبێلانەی هاوردە دەکرێن، بەمەش گوزەرانی خەڵکی ئەمریکا "باشتر" دەکات، بەڵام بەپێی قسەی خۆی ئەگەر ئەو نەبێتەوە سەرۆک ئەوا "گۆمی خوێن" بۆ پیشەسازی ئۆتۆمبێل و وڵاتەکەی هەڵدەستێت.

 

لەلایەکی دیکەوە: لە سۆشیاڵ میدیادا، هەژماری هەڵمەتی جۆ بایدن، سەرۆکی ئەمریکا وەڵامی ئەم قسانەی ترەمپی دایەوە و بە دۆڕاو لە هەڵبژاردنەکانی ساڵی 2020 ناوی دەهێنن.