وەزیری سامانە سروشتییەکان: دوو گرێبەستمان لە بواری نەوت و غاز واژۆ کرد

ئاڤا نیوز

حکومەتی هەرێمی کوردستان دوو گرێبەستی لە بوارەکانی بەرهەمهێنانی نەوت و غاز لەگەڵ ئەمریکا واژۆ کردووە، وەزیری سامانە سروشتییەکانیش دەڵێت، 18 بۆ 20 مانگ هەڵسەنگاندن دەکرێت، دواتر کێڵگەکە فراوان دەکرێت.

وێنە گەورەکە: ڕۆژی 17-5-2025، سەرۆکوەزیران مەسرور بارزانی و شاندێکی یاوەری سەردانی واشنتنیان کرد، لەگەڵ گەورە بەرپرسانی ئەو وڵاتە و چەند کۆمپانیایەکی بواری نەوت و غاز کۆبووەوە.

لێدوانی فەرمی: کەمال محەممەد، وەزیری سامانە سرووشتییەکانی حکومەتی هەرێمی کوردستان بە وەکالەت، لە کۆنگرەیەکی ڕۆژنامەوانیدا ڕایگەیاند: مەبەستی سەردانەکەی سەرۆکوەزیران بارزانی و شاندەکەی، بۆ پتەوکردنی پەیوەندیی سیاسیی و ئابووری و سەربازی لەگەڵ حکومەتی ئەمریکا و کۆمپانیاکانی ئەو وڵاتە بوو.

- لەم سەردانەدا دوو گرێبەست لەبواری پیشەسازی نەوت و غاز واژۆکران.

- گرێبەستی یەکەم؛ بۆ بابەتی غازە لەگەڵ کۆمپانیای میران ئینێرجی کە لە دوو کۆمپانیا پێکهاتووە کۆمپانیای 'ئێچ کەی ئێن' و کۆمپانیای 'ئونانس' کە لە بواری نەوت کار دەکات.

- ئەم گرێبەستە بۆ ئەوەیە کە ئەو کێڵگەی غازە بەکاربهێنرێت و بکەوێتە ناو ژێرخانی غاز لە هەرێمی کوردستان، ئەمەش بۆ دابینکردنی کارەبا بۆ هەرێمی کوردستان، پێشتریش بەشێک لەو کارەبایە بۆ عێراق ڕۆیشتووە.

- کۆمپانیای 'ئێچ کەی ئێن'، ئەو داتا و دیراسەیەی کراوە، کێڵگەی میران هەشت تریلیۆن پێ سێجا غازی تێدا هەیە، وەکو دەستپێک لە ماوەی 18 تا 20 مانگ لە قۆناغی یەکەم وەکو دیراسە کاری تێدا دەکرێت.

- پێشبینی دەکرێت 50 تا 70 ملیۆن پێ سێجا  مەتر غاز دەربهێنرێت، دوای ماوەی هەڵسەنگاندنەکە ئەم کێڵگەی غازە فراوانتر دەکرێت.

- کۆمپانیای 'وێسترن زاگرۆس'ی ئەمریکی کە پێشتر لە کێڵگەی کوردەمیر کاری دەکرد، ئێستا گرێبەستی کێڵگەی تۆپخانەش لەگەڵ هەمان کۆمپانیا دەکرێت.

- ئەم گرێبەستانە وەکو گرێبەستەکانی پێشترە و هاوبەشە.

- بۆ ئەم گرێبەستانە ڕاوێژمان بە وەزارەتی نەوت و حکومەتی عێراق نەکردووە، بەڵام ئەم گرێبەستانە لە بەرژوەندی عێراقیشە.