کەمتر لە 48 کاتژمێری داهاتوو لیستی مووچەی مانگی پێنج ئامادە دەکرێت

ئاڤا نیوز

لیستی مووچەی مانگی پێنج بە کەمتر لە 48 کاتژمێری داهاتوو ئامادە دەکرێت. حکومەتی عێراقیش بۆ مووچەی مانگی پێنج بڕیاری لێبڕینی بەشێکی مووچە لەسەر فەرمانبەرانی کوردستان جێبەجێ دەکات و هەموو فەرمانبەرانیش دەگرێتەوە.

وێنە گەورەکە: ئامادەکردنی لیستی مووچەی مانگی پێنج دەستی پێکرد، ئەمڕۆ سیستەمی پەیرۆڵ کارا کرا و بڕیارە لە دوو ڕۆژی داهاتوودا تەواو بکرێت.

لێدوانی فەرمی: هیوا ئەفەندی، سەرۆکی فەرمانگەی تەکنەلۆژیای زانیاری هەرێمی کوردستان کە سەرپەرشتی سیستەمی پەیرۆڵ دەکات، بە ئاڤای گوت، بە کەمتر لە 48 کاتژمێری داهاتوو لیستی مووچە تەواو دەبێت، پێنجشەممە لیستەکە بەتەواوی ئامادە دەبێت و دەکەوێتە سەر وەزارەتی دارایی کەی دەینێرێت.

ڕوونیشی کردەوە، ئامادەکردنی لیستی مووچە هیچ کێشەیەکی نەماوە، لە داهاتوودا پێویست ناکات هیچ فەرمانبەرێک بەهۆیەوە نیگەران بێت.

"مانگانە دەتوانین بە 48 کاتژمێر لیستی مووچە ئامادە بکەین، بەڵام هەندێک جار بەهۆی هەندێک ڕۆتینیات لیستی مووچە درەنگ دەست بە ئامادەکردنی دەکرێت. بۆنموونە ئەم مانگە لێبڕینی سەدا یەکی مووچە هۆکار بوو بۆ درەنگ ئامادەکردنی.

وەزارەتی دارایی کوردستان چاوەڕوانی وەزارەتی دارایی عێراق بوون بۆئەوەی بزانێت کە ئەم لێبڕینە بۆ مووچەی مانگی پێنجە یان مانگی دواتر. وەزارەتی دارایی عێراق دوێنێ وەڵامی وەزارەتی دارایی کوردستانی داوەتە کە لێبڕینەکە لە مووچەی مانگی پێنج بکرێت.

ئەوەی پێویستە بیزانیت: بەگوێرەی بڕیاری 281ـی وەزارەتی پلاندانانی عێراق و ڕاسپاردەی وەزیری دارایی عێراق، بە رێژەی 1% لێبڕین لە مووچەی بنەڕەتی فەرمانبەران دەکرێت، هی مووچەی فەرمانبەرانی هەرێمی کوردستان لە مووچەی مانگی داهاتوو واتا پێنج دەبێت.