بەرکەوتوویەکی چەکی کیمیایی لە هەڵەبجە تووشی خوێنبەربوونی سییەکان بووە

ئاڤا نیوز

بەرکەوتوویەکی چەکی کیمیایی لە هەڵەبجە تووشی خوێنبەربوونی سییەکان بووە و ژیانی لە مەترسیدایە و پێویستی بەوەیە بەخێرایی ببرێتە دەرەوەی وڵات و نەشتەرگەری بۆ بکرێت.

چیرۆکی سەرەکی: ڕۆشنا حەمەئەمین ساڵح، تەمەنی 37 ساڵە و هەشت مانگ بووە کاتێک کیمیابارانی هەڵەبجە ڕوویداوە. ئەو بەرکەوتووە ئێستا تووشی خوێنبەربوونی سییەکان بووە کە قورسترین تووشبوونی بەرکەوتووانی چەکی کیمیاییە و ژیانیشی لە مەترسیدایە، پێویستی بەوەیە بەخێرایی ببرێتە دەرەوەی وڵات و نەشتەرگەری بۆ بکرێت.

زیانە سەرەکییەکان: خێزانەکەی ڕۆشنا هەشت ئەندام بوون و ساڵی 1988 لە گەڕەکی عومەری خاوەر سەرجەمیان بەر چەکی کیمیایی کەوتوون، بەداخەوە چوار کەسیان، دایک و باوک و دوو برای هەر ئەوکات شەهید بوون، بەڵام خۆیی و خووشکێکی و دوو برای ماونەتەوە، خوشکەکەی دۆخی تەندروستی باشە، دوو براکەشی لەسەر ئەکری خۆیان چوونەتە دەرەوەی وڵات و نەشتەرگەریی سییەکانیان بۆ کراوە و ئێستا ئەوانیش تەندروستیان باشە، بەڵام ڕۆشنا کرێچییە و خاوەنی پێنج منداڵی بێ باوکە، لەڕێگەی ئاڤاوە داوا لە حکومەت و وەزارەتی تەندروستی دەکات بەخێرایی بەهایانەوە بچن.

لێدوانی فەرمی: ئازاد مستەفا، بەڕێوەبەری گشتیی تەندروستی هەڵەبجە بۆ ئاڤا میدیا پشتڕاستی کردەوە کە ڕۆشنا بەرکەوتەی چەکی کیمیاییە، بەپێی ڕاپۆرتە پزیشکییەکانیش تووشی خوێنبەربوونی سییەکان بووە، لێرە ناتوانرێت چارەسەر بکرێت و تەنها لە ئەڵمانیا چارەسەری هەیە.

- پێشتر تووشبووی وا هەبووە کە لە دەرەوەی وڵات نەشتەرگەریی بۆ کراوە و ئێستا تەندروستی باش بووە.

ئەوەی پێویستە بیزانیت: بەپێی ئاماری کۆمەڵەی قوربانییانی هەڵەبجە، لە سەرتاسەری هەرێمی کوردستان 808 بەرکەوتووی چەکی کیمیایی هەیە، 25 کەسیان بەردەوام پێویستیان بە ئۆکسجین هەیە و 23 کەسی دیکەشیان ناوەناوە پێویستییان بە ئۆکسجین هەیە.