وتەبێژی بەرگری شارستانی: پێشبینی ساڵێكی سەختی ڕووداوەكانی ئاگركەوتنەوە دەكەین

ئاڤا نیوز

وتەبێژی بەرگریی شارستانیی هەرێمی كوردستان هۆشداری دەدات لەوەی؛ هاوینی ئەمساڵ ئەگەری گڕگرتنی پووش و پاوان بەهۆی وشكەساڵییەوە، بەراورد بە ساڵانی ڕابردوو زیاتر بێت و ساڵێكی سەختی ڕووداوەكانی ئاگركەوتنەوە بێت.

وێنە گەورەكە:  نزیکەی نیوەی ڕووداوەکانی ئاگر کەوتنەوەی ئەمساڵ لە دوو هەفتەی ڕابردوو بووە، پێشبینش دەكرێت بەهۆی وشكەساڵی و كەمی بارانبارینەوە، ئەم هاوینە ڕووداوەكانی گڕگرتنی پووش و پاوان زیاتر بن.

لێدوانی فەرمی: سەركەوت كاڕەش، وتەبێژی بەڕێوەبەرایەتیی بەرگریی شارستانیی هەرێمی كوردستان تایبەت بە ئاڤا ڕایگەیاند، بەگوێرەی پلانی ساڵانەی بەڕێوەبەرایەتیی بەرگریی شارستانی، لەگەڵ هاتنی وەرزی گەرما لە سەرجەم ئەو شوێن و ناوچە دوورەدەستانەی كە بنكەی بەرگریی شارستانی لێ نییە، سەرووی 60 تیمی گەڕۆكی بەرگریی شارستانی دابەش دەكرێن، بۆ ڕێگریكردن لە هەر حاڵەتێكی نەخوازراوی ئاگركەوتنەوە.

زانیاریی زیاتر: ئەركی ئەو تیمە گەڕۆكانەی بەرگریی شارستانی ئەوەیە كە بەهەماهەنگی لەگەڵ بەرپرسانی ئیداریی ئەو شوێنانە، ڕێگری لەهەر جۆرە حاڵەتێكی ئاگركەوتنەوەی كتوپڕ بكەن بەتایبەت لە وەرزی هاویندا كە بەهۆی وشكبوونی پووش و پاوانەوە، ئەگەری ئاگركەوتنەوە زیاتر دەبێت.

مەترسی پێشبینیكراو: ئەمساڵ بەراورد بە ساڵانی ڕابردوو، مەترسیی وشكەساڵی ئەگەری گڕگرتنی پووش و پاوان زیاتر دەكات و پێشبینی دەكرێت ساڵێكی سەختی ڕووداوەكانی ئاگركەوتنەوە بێت، ئەمە بە وتەی وتەبێژی بەرگریی شارستانیی هەرێمی كوردستان.

سێ ڕێنمایی گرنگ بۆ ڕێگریكردن لە سووتانی پووش و پاوان:

بەرگریی شارستانی بۆ ڕێگریكردن لە ڕووداوەكانی ئاگركەوتنەوە لە دەشت و دەر، 3 ڕێنمایی گرنگ بە هاووڵاتیان دەدات:

یەكەم: دووركەوتنەوە لە فڕێدانی پاشماوەی جگەرە.

دووەم: ئاگاداربوون لە شۆرتی كارەبایی و تەكنیكی ئامێرەكانی دوورینەوەی گەنم و جۆ.

سێیەم: جێنەهێشتنی پاشماوەی خەڵووز و غاز لەكاتی ئامادەكردنی خواردن.