تەندروستی زیقار: هیچ تووشبوویێکی تای خوێنبەربوون لە زیقار نەماوە

ئاڤا نیوز

تەندروستی زیقار چاكبوونەوەی سەرجەم تووشبووانی تای خوێنبەربوونی لەپارێزگاکە ئاشکرا کرد و دەڵێت، ئێستا هیچ تووشبوویێک بە نەخۆشی تای خوێنبەربوون لە پارێزگای زیقار نەماوە.

وێنە گەورەکە: لەگەڵ بڵاوبوونەوەی نەخۆشی تای خوێنبەربوون لە عێراق، پارێزگای زیقار زۆرترین تووشبووی تای خوێنبەربوونی تۆمار كرد و ژمارەی تووشبووانی پەتاکە لە سەرەتای ساڵی 2025ـەوە گەیشتووەتە 29 کەس.

لێدوانی فەرمی: ڕەشید نەجم خالیدی، بەڕێوەبەری گشتیی فەرمانگەی تەندروستی زیقار ڕایگەباند: لە ماوەی هەفتەی ڕابردوودا هیچ تووشبووێکی نوێی تای خوێنبەربوون لە پارێزگاری زیقار تۆمار نەکراوە، هاوکات سەرجەم تووشبووانیش چاكبوونەتەوە و ڕەوانەی ماڵەوە كراونەتەوە، ئێستا هیچ تووشبووێك لە نەخۆشخانە نەماون.

ئەوەی پێویستە بیزانیت:  تای خوێنبەربوون نەخۆشییەکی ڤایرۆسییە و لە ئاژەڵەوە بۆ مرۆڤ دەگوازرێتەوە، نیشانەکانی نەخۆشییەکە بریتین لە بەرزبوونەوەی پلەی گەرمیی جەستە، سەرئێشە و خوێنبەربوونی ژێر پێست، هاوکات بە نەخۆشییەكی كوشندە هەژماردەكرێت و تا ئێستا چەندین کەسیش بەو نەخۆشییە گیانیان لەدەستداوە.