گرفتێکی گەورە ڕووبەڕووی هەڵبژاردنی پەرلەمانی کوردستان دەبێتەوە

ئاڤا نیوز

گرفتێکی دیکە ڕووبەڕووی سەدان هەزار دەنگدەر دەبێتەوە و ئەگەر چارەسەر نەکرێت بە کۆی گشتی 40٪ی دەنگدەران ناتوانن بەشداری لە هەڵبژاردنی پەرلەمانی کوردستاندا بکەن.

وێنە گەورەکە: نێچیرڤان بارزانی، سه‌رۆكی هه‌رێمی لە نووسراوێکدا کە ئاراستەی کۆمیسیۆنی سەربەخۆی هەڵبژاردنەکانی عێراقی کردووە، ئاماژەی بەوە کردووە 20%ی ئەو دەنگدەرانەی کارتی بایۆمەترییان نوێ کردووەتەوە کە دەکاتە 650 هەزار دەنگدەر کێشەی پەنجەمۆریان هەیە، ئەمە لەکاتێکدایە 839 هەزار دەنگدەر کە دەکاتە 25%ـی دەنگدەران بەهۆی ئەوەی کارتی بایۆمەترییان نوێنەکردووەتەوە ناتوانن بەشداری هەڵبژاردن بکەن.

لێدوانی فه‌رمی: جومانە غەلای، گوتەبێژی کۆمیسیۆنی هەڵبژاردنەکان بە ئاڤا نیوز گوت: "بەپێی یاسا و ڕێنمایی کۆمیسیۆن ته‌نیا له‌ 5%ی ده‌نگده‌ران ده‌توانن به‌بێ په‌نجه‌مۆر ده‌نگ بده‌ن، به‌شه‌كانی هونەری و كارگێڕی و یاسایی كۆمیسیۆن كاری ڕژد بۆ چارەسەرکردنی کێشەکە دەکەن، ئامانجمانە هەڵبژاردن بەبێ گرفت بکرێت". 

ئه‌وه‌ی پێویست بیزانیت: نێچیرڤان بارزانی  لە نووسراوەکەدا کە ڕۆژی 11-3-2024 ئاراستەی کۆمیسیۆنی کردووە، چەند تیبینی و داواکارییەکی خستووەتەڕوو:

- هه‌ڵه‌ و كێشه‌ی ته‌كنیكی په‌نجه‌مۆری ده‌نگده‌ران چارەسەر بكرێت.
- پێویسته‌ كورسییه‌كانی پارێزگای هه‌ڵه‌بجه‌ زیادبكرێن.
- پرۆسه‌ی هه‌ڵبژاردن به‌ته‌واوه‌تی له‌ باره‌گای ده‌سته‌ی كۆمیسیۆن له‌ هه‌رێمی كوردستان بكرێت.
- نوێنه‌ری هه‌رێمی كوردستان له‌ بواری ته‌كنه‌لۆژیا له‌ سه‌نته‌ری ته‌كنیكی كۆمیسیۆن ئامادەبێت.
- ئه‌نجامی بەرایی دەنگدان له‌ سه‌رجه‌م وێستگه‌كان ڕاستەوخۆ له‌سه‌ر ماڵپه‌ڕی كۆمیسیۆن بڵاوبكرێته‌وه‌.

ژماره‌كان واده‌ڵێن: لە هەرێمی کوردستان سێ ملیۆن و 789 هەزار و 360 كەس مافی دەنگدانیان هەیە، لەو ژمارەیە دوو ملیۆن و 950 هەزار دەنگدەر کارتی بایۆمەتری دەنگدانیان نوێکردووەتەوە.

بۆچی گرنگه‌: وێڕای ئەوەی کێشەی پەنجەمۆر نیگه‌رانی بۆ سەدان هەزار ده‌نگده‌ر دروست کردووە، ئەگەر ئەم گرفتە چارەسەر نەکرێت کاریگەری زۆری لەسەر ڕێژەی بەشداریکردن لە هەڵبژاردن و دەنگی لایەنەکان دەبێت.

نموونەی کارتێکی دەنگدان کە لەسەری نووسراوە بەبێ پەنجەمۆر