لە عێراق دووەمین کۆنگرەی نێودەوڵەتی بۆ بەرەنگاربوونەوەی سپیکردنەوەی پارە بەڕێوەدەچێت

ئاڤا نیوز

ئەمڕۆ کارەکانی دووەمین کۆنگرەی نێودەوڵەتی بەغدا بۆ ڕووبەڕووبوونەوەی سپیکردنەوەی پارە و پارەدارکردنی تیرۆر بەڕێوەدەچێت، تیایدا نەخشەڕێگای بانکی بۆ زیاتر گەشەپێدانی پارەدانی ئەلیکترۆنیش تاوتوێ دەکرێت.

بۆچی گرنگە: ئێستا کۆی پرۆسەی پارەدانی ئاڵوگۆڕی بازرگانی عێراق لەگەڵ وڵاتانی جیهان کە ساڵانە دەیان ملیار دۆلارە، لەڕێگەی بانکی نێوەندگیریی ئەمریکاوە دەکرێت ئەوەش کێشەی بانکە عێراقییەکانی کەمکردووەتەوە کە تۆمەتباردەکران بە سپیکردنەوەی پارە.

لێدوانی فەرمی: عەلی تارق، سەرۆکی جێبەجێکاری کۆمەڵەی بانکە تایبەتەکانی عێراق ڕایگەیاند، کۆنگرەکە بە چاودێریی سەرۆکوەزیرانی عێراق بەڕێوەدەچێت و دوو ڕۆژ بەردەوام دەبێت، تیایدا گەشەپێدانی ڕێکارەکان بۆ ڕووبەڕووبوونەوەی سپیکردنەوەی پارە و پارەدارکردنی تیرۆر تاوتوێ دەکرێن، گفتوگۆش لەسەر یاسا پێویستەکان دەکرێت بۆ بەرزکردنەوەی ئاستی دامەزراوە داراییەکان.

ئەوەی پێویستە بیزانیت: کۆنگرەکە لەژێر ناونیشانی "ئاستەنگیی بەردەم بانکە عەرەبییەکان لە پابەندبوون بە یاسا و ڕێسا نێودەوڵەتییەکان، ڕێگاکانی جێبەجێکردنی پێداویستییەکانی بانکە نێوەندگیرەکان" بەڕێوەدەچێت، تیایدا نوێنەرانی بانک، پەرلەمان، باڵیۆزخانە و ڕێکخراوە نێودەوڵەتییەکانی وڵاتانی عەرەبی و بیانی بەشداردەبن.