لە هەولێر هەزاران ڤەیپ و جگەرەی ئەلیکترۆنی لەناوبران

ئاڤا نیوز

لیژنە هاوبەشەکانی قایمقامییەتی هەولێر، لەهەڵمەتێکدا دەستیان بەسەر هەزاران ڤەیپ و جگەرەی ئەلیکترۆنیدا گرت، کە بەشێوەی قاچاغ هاوردەکراون و قایمقامی قەزای ناوەندی هەولێریش دەڵێت، "سزاکان تووندتر دەکەین."

وێنە گەورەکە: لە سەرەتای ساڵی 2024ـەوە کڕین و فرۆشتنی ڤەیپ و جگەرەی ئەلیکترۆنی لە هەرێمی کوردستان قەدەغەکراون، هەڵمەتێکی فراوان بۆ دەستبەسەرداگرتنیان بەردەوامە و تاوەکو ئێستا 50 هەزار ڤەیپ و جگەرەی ئەلیکترۆنی لەناوبراون و  دەیان شوێن بەهۆی سەرپێچیکردن داخراون.

لێدوانی فەرمی: نەبەز عەبدولحەمید، قایمقامی قەزای ناوەندی هەولێر ڕایگەیاند، "پڕۆسەکە بەردەوام دەبێت و ئەو شوێنانەشی بە ئۆنلاین کڕین فرۆشتن بە ڤەیپ و جگەرەی ئەلیکترۆنی دەکەن، لەلایەن پۆلیسی هەولێرەوە بەدواداچوونیان لەسەر دەکرێت و  ڕووبەڕووی سزای پێبژاردن و داخستن دەبنەوە."

زانیاریی زیاتر: بە گوتەی قایمقامی قەزای ناوەندی هەولێر، لەمەودوا سزاکان تووندتر دەکرێن بۆ ئەو پرسەش لەگەڵ داواکاری گشتیی لەسەر هێڵن، بۆ ئەوەی بەتەواوەتی کڕین و فرۆشتن بە ڤەیپ و جگەرەی ئەلیکترۆنی بنبڕ بکەن.