پەرلەمانی عێراق لەسەر مووچەی فەرمانبەرانی کوردستان هاتە دەنگ

ئاڤا نیوز

دەستەی سەرۆکایەتی پەرلەمانی عێراق نیگەرانی بەرامبەر بە بڕیارەکەی وەزارەتی دارایی فیدراڵ بۆ بڕینی مووچەی فەرمانبەرانی هەرێمی کوردستان  دەربڕی و داوای پێداچوونەوە بەبڕیارەکە دەکات.

چیرۆکی سەرەکی:  ئەمڕۆ چوارشەممە‌، دەستەی سەرۆکایەتی پەرلەمانی عێراق ڕاگەیێنراوێکی لەبارەی بڕیاری ڕاگرتنی مووچەی مووچەخۆرانی هەرێمی کوردستان لەلایەن وەزارەتی دارایی عێراقەوە، بڵاوكرده‌وه‌.

ڕاگەیێنراوی فەرمی: دەستەی سەرۆکایەتی پەرلەمانی عێراق لە ڕاگایێنراوێکدا ڕایگەیاند: "بڕیارەكەی وەزارەتی دارایی عێراق بۆ ڕاگرتنی مووچەی فەرمانبەرانی هەرێمی كوردستان، زیان بە هاووڵاتیانی هەرێمی کوردستان دەگەیەنێت و قەیرانی ئابووری دروست دەکات، هاوکات پێشێلکردنی بڕیارەکانی دادگای فیدراڵی و دەستوورە کە مافی سەرجەم هاووڵاتییان لەهەر شوێنێکی عێراق مسۆگەر دەکات.

زانیاریی زیاتر: دەستەی سەرۆکایەتی پەرلەمانی عێراق داوا لە حکومەتی فیدراڵ دەكات بەبڕیارەکەی بچێتەوە، خەرجكردنی مووچەی فەرمانبەرانی هەرێمی كوردستان بەهیچ شێوەیەك تێكەڵی ناكۆكیی سیاسی نەكرێت، ئاماژە  بەوەش دەکات، بۆ چارەسەری کێشەکانی نێوان بەغدا و هەولێر، دانوستان و لێکتێگەیشتن باشترین ڕێگایە.

باکگراوند: ڕۆژی چوارشەممە ڕێککەوتی 28ـی 5ـی 2025، تەیف سامى، لەڕێگەی نووسراوێکەوە حکومەتی هەرێمی کوردستانی ئاگادارکردووەتەوە کە چیدیکە بەغدا ناتوانێت مووچەی فەرمانبەرانی کوردستان بنێرێت، ئەمەش بە پاساوی ئەوەی هەرێمی کوردستان بڕی پشکی خۆی لە یاسای بودجە تێپەڕاندووە.