پێنج تووشبووی نوێی تای خوێنبەربوون لە زیقار تۆمار کران

ئاڤا نیوز

لە ماوەی پشووی جەژنی قورباندا لە پارێزگای زیقار پێنج تووشبووی نوێ بە نەخۆشیی تای خوێنبەربوون تۆمار کراوە، بەرزبوونەوەی ژمارەکان لەو پارێزگایە جێی نیگەرانیی لایەنە تەندروستییەکانە.

وێنە گەورەکە: چەند مانگێکە ڤایرۆسی تای خوێنبەربوون لە پارێزگاکانی عێراق و هەرێمی کوردستان بڵاوبووەتەوە، وەزارەتی تەندروستی عێراقیش هۆکارەکەی بۆ  خراپی هۆشیاریی تەندروستی لای هەندێک لە بەخێوکەرانی ئاژەڵ و خراپی پاکوخاوێنی ناو کێڵگەکان دەگەڕێنێتەوە کە بووەتە ژینگەیەکی لەبار بۆ بڵاوبوونەوەی ئەو پەتایە.

زانیاریی بەدەستهاتوو: بەپێی زانیارییەکانی سەرچاوەیەکی پزیشکیی ئاگادار لە پارێزگاکە، کە قسەی بۆ میدیای عێراق کردووە، ڕایگەیاند، پشکنینە تاقیگەییەکان تووشبوونی ئەو پێنج کەسەیان پشتڕاست کردووەتەوە، هاوکات جەختی لەسەر پێویستیی دوورکەوتنەوە لە سەربڕینی هەڕەمەکی ئاژەڵان کردەوە.

ئەوەی پێویستە بیزانیت: بەگوێرەی دوایین ئامارەکانی وەزارەتی تەندروستیی عێراق لەسەر زاری سەیف بەدر، وتەبێژی وەزارەتەکە بۆ ئاڤا میدیا، ژمارەی توشبوون بە تای خوێنبەربوون لەسەرەتای ئەمساڵەوە بۆ 107 تووشبوو بەرزبووەتەوە، لەو ژمارەیەدا 16 تووشبوویان گیانیان لەدەستداوە، زۆرترین توشبوو و مردنیش بەهۆی پەتاکەوە لە پارێزگای زیقار تۆمارکراوە.

باکگراوند: تای خوێنبەربوون بە یەکێک لە نەخۆشییە ڤایرۆسییە مەترسیدارەکان دادەنرێت کە دەبێتە هۆی خوێنبەربوونی ناوەکیی تووند و تێکچوونی فرمانی بۆرییەکانی خوێن. زۆرجاریش لە ڕێگەی مێرووی "گەنە" یان بەرکەوتن لەگەڵ خوێن و دەردراوەکانی ئاژەڵی تووشبووەوە دەگوازرێتەوە.