وەزارەتی دارایی یەکە ژمێریارییەکان لەبارەی گۆڕانکاری لە سیستمی پەیڕۆل ئاگادار دەکاتەوە

ئاڤا نیوز

وەزارەتی دارایی و ئابووری بە مەبەستی زانینی جیاوازییەکان، مانگانە پەیوەست بە دۆخی مووچەخۆران یەکە ژمێرییەکان ئاگادار دەکاتەوە کە دەتوانن ڕۆژانە گۆڕانکاری لە سیستمی ناوەندیی مووچە بکەن.

وێنە گەورەکە: مانگانە گۆڕانکاری لە دۆخی مووچەخۆران لە سیستمی پەیڕۆل دەکرێت، ئەو گۆڕانکارییانەش؛ خانەنشینکردن، مۆڵەتی بێ مووچە، مۆڵەتی بە مووچە، دەست لەکارکێشانەوە، کۆچکردن، مۆڵەتی دایکایەتی و مۆڵەتی خوێندن دەگرێتەوە، ئامانج لێی زانینی جیاوازییەکانە بۆ ئەوەی بە شەفافی لە لیستی مووچە جێگیر بکرێت.

لێدوانی فەرمی: سەرچاوەیەک لە وەزارەتی دارایی و ئابووری هەرێمی کوردستان بە ئاڤای گوت، "گشت یەکە ژمێریارییەکانی سەر بە دامودەزگاکان، دەتوانن گۆڕانکاری لە دۆخی مووچەخۆر بکەن لە سیستەمی ناوەندیی مووچە بەشی مووچەخۆران، چونکە ئەم گۆڕانکارییانە لە سیستەم پەیوەندیدار نین بە کردنەوەی خشتەی مووچە و دەکرێت ڕۆژانە بکرێن، پێویستە لەکەمتر لە 48 کاتژمێر پەسەند بکرێت.

قووڵتر: مانگانە فەرمانبەری نوێ مامەڵەیان تەواو دەبێت و خانەنشین دەبن، پێویستە زانیارییەکانی بگۆڕدرێن، هاوکات تۆمارکردنی ئەو فەرمانبەرانەی مۆڵەتی بێ مووچە و بە مووچە دەکەن، دەستلەکارکێشانەوە، کۆچکردن، مۆڵەتی دایکایەتی و مۆڵەتی خوێندن پێویستە لەگەڵ وادەی خۆیان و جیاوازییەکانی مووچەیان تۆماربکرێت.