بڕیاری دادگای فیدڕاڵی لەبارەی مووچەی فەرمانبەرانی هەرێمی کوردستان دەکەوێتە هەفتەی داهاتوو

ئاڤا نیوز

ئەگەرچی لە یەکی ئەم مانگەوە لەلایەن فەرمانبەرانی هەرێمی کوردستان سکاڵا دژی بڕیارێکی وەزارەتی دارایی عێراق لە دادگای فیدڕاڵی تۆمار کراوە، بەڵام بەهۆی تەواو نەبوونی ڕێژەی یاسایی ئەندامانی دادگا ئەو پڕۆسەیە دواکەوتووە، بەگوێرەی زانیاری ئاڤا، هەر بڕیارێکی دادگای فیدڕاڵی لەبارەی مووچەی فەرمانبەران دەکەوێتە هەفتەی داهاتوو.

چیرۆکی سەرەکی: ڕۆژی 2025-05-28، وەزارەتی دارایی عێراق بە واژۆی تەیف سامی، بڕیاری ڕاگرتنی مووچەی فەرمانبەرانی هەرێمی کوردستانی دەرکرد، ئەمەش بە بیانووی نەمانی تەرخانی دارایی ساڵی 2025، ڕۆژی 1ـی 6، کۆمەڵێک فەرمانبەری هەرێمی کوردستان لە دادگای فیدڕاڵی سکاڵایان دژی ئەو بڕیارە تۆمار کرد، هەر ئەو ڕۆژە دادگا بە فەرمانی ژمارە 104ـی فیدڕاڵی سکاڵاکەی وەرگرت، بەڵام بەهۆی ئەوەی سەرۆک و چوار لە ئەندامانی دادگا بۆ بەجێهێنانی فەریزەی حەج سەردانی سعوودیەیان کرد بوو ئەو پڕۆسەیە دواکەوت.

زانیاریی پەیامنێر: دەروون مەلا ناجی، پەیامنێری ئاڤا لە بەغدا دەڵێت: ئەو پێنج دادوەرەی چووبوون بۆ حەج گەڕاونەتەوە، بەڵام ئەمڕۆ چوارشەممە تەنیا جاسم عمێری، سەرۆکی دادگای باڵای فیدڕالی گەڕاوەتەوە دەوام و ئەوانی دیکە هێشتا نەگەڕاونەتەوە ئەمەش پڕۆسەکەی دواخستووە، چونکە ڕێژەی یاسایی تەواو ناکات. دادگا تەنیا سبەی لەبەردەستە ئەگەر سبەی فەرمان سالاریی (ئەمر وەلائی) دەرنەکات تا 2025-06-16، واتا ڕۆژی دووشەممەی هەفتەی داهاتوو دوادەکەوێت، چونکە ڕۆژی یەکشەممە بەبۆنەی ڕۆژی غەدیر لە عێراق پشووی فەرمییە.