دەروازە سنوورییەکان: بەستنەوەی ئەلیکترۆنی خاڵە گومرگییەکانی کوردستان و عێراق کۆتایی هات

ئاڤا نیوز

دەستەی دەروازە سنوورییەکانی عێراق، پرۆسەی بەستنەوەی ئەلیکترۆنی سەرجەم خاڵە گومرگییەکانی نێوان هەرێمی کوردستان و عێراقی بە بارەگای سەرەکی دەستەکە لەبەغدا ئاشکرا کرد و دەڵێت، لەمەودوا پێناسەی نوێی گومرگی جێبەجێ دەکرێت.

چیرۆکی سەرەکی: پاڵپشت بەبڕیاری ئەنجوومەنی وەزیرانی عێراق ژمارە 270ـی ساڵی 2025، دەستەی گومرگی عێراق، پێناسەی نوێی نرخی گومرگی  بۆ کەلوپەل و کاڵاکان ڕاگەیاند و بڕیارەکە لە 1-6-2025 ـەوە لە سەرجەم دەروازە سنوورییەکان، بە دەروازەکانی هەرێمی کوردستانیشەوە دەکەوێتە بەرواری جێبەجێکردنەوە.

ڕاگەیێنراوی فەرمی: دەستەی دەروازە سنورییەکانی عێراق لەبەیاننامەیەکدا ڕایگەیاند: پرۆسەی بەستنەوەی ئەلیکترۆنی سەرجەم دەروازە گومرگییەکان لە خاڵەکانی پشکنینی هەرێمی کوردستان بە بارەگای سەرەکی دەستەکە لەبەغدا تەواوبووە و بازگەی باوە مەحموودیش کە دەکاتە خاڵی پشکنینی نێوان سلێمانی و دیاله دوا خاڵبوو.

دەستەکە ئاماژە بەوەکرد، بەتەواوبوونی بەستنەوەی باوە مەحموود تۆڕی بەستنەوەی ئەلیکترۆنی سەرجەم خاڵە گومرگییەکانی هەردوو حکومەتی هەرێمی کوردستان و حکومەتی ناوەند کۆتایی هات و دەکەوێتە بوواری جیبەجێکردنەوە.