هۆشداری بە گەشتیاران دەدرێت؛ بەهیچ جۆرێک نەچنە ژێر تونێلە بەفرینەکان

ئاڤا نیوز

هۆشداری بەو گەشتیارانە دەدرێت کە سەردانی سنووری قەزای چۆمان دەکەن، بەهیچ جۆرێک نەچنە ژێر تونێلە بەفرینەکان و بەسەریاندا نەڕۆن،  بەڵکو لە نزیکەوە چێژ لە بینینیان وەربگرن.


وێنە گەورەکە: قەزای چۆمان کە چوار ناحیەی لەخۆگرتووە، بەهۆی فێنکی  و جوانی سروشتی ناوچەکە و مانەوەی بەفر لە بەشێک لە شاخەکان لە هەر چوار وەرزدا، ساڵانە ژمارەیەکی زۆری گەشتیار سەردانی سنووری چۆمان دەکەن.

لێدوانی فەرمی: هەڵگورد محەممەد، بەڕێوەبەری گەشتوگوزاری چۆمان بە ئاڤای گوت: بەهۆی بەرزبوونەوەی پلەی گەرمی تونێلە بەفرینەکان مەترسی داڕمانیان لێدەکرێت، ساڵانی ڕابردووش ژمارەیەک گەشتیار بوونە قوربانی داڕمانیان، بۆیە داوا لە گەشتیاران دەکەین سەرکێشی نەکەن و بە هیچ جۆرێک نەچنە ژێر ئەو تونێلانە و بەسەریاندا نەڕۆن، بەڵکو لە نزیکەوە چێژ لە بینینیان وەربگرن.

زانیاریی زیاتر: ئەو شوێنانەی تونێلی بەفرینی لێیە، تابلۆی ئاگادار کردنەوە بە هەرسێ زمانی کوردی، عەرەبی و ئینگلیزی دانراون.

ئەوەی پێویستە بیزانیت: ساڵی رابردوو زیاتر لە 200 هەزار گەشتیار سەردانی سنووری قەزای چۆمانیان کردووە، پێشبینی دەکرێت تاکۆتایی ئەمساڵ زیاتر لەو ژمارەیە سەردانی چۆمان بکەن ، بەشێکی ئەو گەشتیارانەش سەردانی ئەو شوێنانە دەکەن کە تونێلە بەفرینەکانی لێیە.