ئێران هەڕەشەی تووند لە سەرۆکی ئاژانسی نێودەوڵەتیی وزەی ئەتۆم دەکات

ئاڤا نیوز

 

ئێران هەڕەشە لە سەرۆکی ئاژانسی نێودەوڵەتیی دەکات و بەهۆکاری هەڵگیرسانی جەنگی تۆمەتباری دەکات، هەڕەشەکان بە جۆرێکن ڕوێژکاری خامنەیی لە پەیامێکدا دەڵێت: تۆ و ئێمە و دوای جەنگ. 

 

وێنە گەورەکە: زیاتر لە هەفتەیە جەنگی نێوان ئیسرائیل و ئێران سەریهەڵداوە و هەردوولا بە چەندین شێواز ڕووبەڕووی یەکتری بوونەتەوە و دیار نییە ئاگری ئەو شەڕە کەی دەکوژێتەوە؛ ئیسرائیل هەڕەشەی لەناوبردنی ژێرخانی ئەتۆمی ئێران دەکات و لەبەرامبەردا ئێران دەڵێت ئیسرائیل دەسووتێنم. 

 

زانیاریی زیاتر: ڕۆژێک بەر لە هێرشی ئیسرائیل بۆ سەر ئێران، ئاژانسی وزەی ئەتۆمی لە ڕاپۆرتێکدا کە پشتی بە لێدوان و شیکردنەوەی سەرۆکی ئاژانسەکە بەستبوو، چەند زانیارییەکی لەبارەی چالاکییەکانی ئێران کردبوو لە پەرەپێدانی وزەی ئەتۆم و دەڵێت: ماوەیەکی زۆرە ئەو وڵاتە پەیوەستە بە پڕۆگرامی ئەتۆمییەوە و هەموو پابەندییەکانی فەرامۆش کردووە. 

٠ ئیسرائیل دوای بڵاوبوونەوەی ئەم ڕاپۆرتە دەستی بە چالاکی کرد و هێرشی بەرفراوانی بۆ سەر ئێران دەستپێکرد کە بووە هۆی هەڵگیرسانی جەنگ. 

 

ئەوەی پێویستە بیزانیت: دواتر رافائيل گرۆسی، سەرۆکی ئاژانسی نێودەوڵەتیی وزەی ئەتۆم لە چاوپێکەوتنێکیدا لەگەڵ کەناڵی سی ئێن ئێنی ئەمریکی دەڵیت،هەتا ئێستا هیچ بەڵگەیەکمان لەبەردەست نییە کە ئێران هەوڵی دابێت پیتاندنی یۆرانیۆمی بۆ مەبەستی چەکی ئەتۆمی بەکارهێنابێت. کاربەدەستانی ئێران بەم قسە و لێدوانە نوێیەی گرۆسی تەواو توڕە و بێزاربوون باس لەوە دەکەن کە ڕاپۆرتەکەی ئاژانسی وزە هۆکاری هەڵگیرسانی جەنگ بووە. 

 

لێدوانی فەرمی: ئیسماعیل بەقائی، وتەبێژی وەزارەتی دەرەوەی ئێران لەسەر لێدوانەکەی ئەم دوای سەرۆکی ئاژانسی نێودەوڵەتی وزەی ئەتۆم دەڵێت: ئێستا کات درەنگە بۆ ئەم قسانەی دەیکەیت، لێدوانی فریودەرانە چارەنووسی خراپ دەبێت. 

 

٠ عەلی لاریجانی، ڕاويژکاری عەلی خامەنەئی، رێبەری باڵای شۆڕشی ئیسلامی دەڵێت: ڕۆژێک دێت بە سزای خۆت بگەیت، دەشڵێت من و تۆ دوای جەنگ. 

 

باکگراوند: بەرەبەیانی ڕۆژی هەینی 13-6-2025 ئیسرائیل بە بەشداریی 200 فڕۆکەی جەنگی هێرشی کردە سەر ئێران و بەهۆیەوە تاوەکو ئێستا زیاتر لە 30 فەرماندەی سەربازی و زیاتر لە 10 زانای بواری ئەتۆمی کوژراون، ئەمە جگە لەوەی ژمارەیەکی زۆر هاووڵاتی ئێرانی بوونەتە قوربانی ئەم جەنگە.