دەیان بەرپرسی پێشووی ئەمریکا داوایەک ئاراستەی بایدن دەکەن

ئاڤا نیوز

 

نزیکەی 70 بەرپرس، دیپلۆماتکار و کەسایەتیی سەربازیی پێشووی ئەمریکا لە نامەیەکی کراوەدا داوا لە جۆ بایدن دەکەن، هەڵوێستێکی تووندتری بەرامبەر بە ئیسرائیل هەبێت. 

 

ڕاگەیێنراوی فەرمی:  لە نامەکەدا هاتووە "دەبێت ویلایەتە یەکگرتووەکانی ئەمریکا ئیرادەی ئەوەی هەبێت کە هەنگاوێکی کۆنکرێتی بۆ ڕووبەڕووبوونەوەی ئەو جۆرە کارانە بنێت، وەک سنووردارکردنی دابینکردنی یارمەتییەکان [ـی ئەمریکا بۆ ئیسرائیل] بە گوێرەی یاسا و سیاسەتیی ئەمریکا".

 

زانیاریی زیاتر: ئەوان داوا دەکەن بایدن ئەو هۆشدارییە بداتە ئیسرائیل کە پێشێلکردنی مافە مەدەنییەکان و نکۆڵیکردن لە پێداویستییە بنەڕەتییەکانی فەلەستینییەکان و فراوانترکردنی کۆمەڵگەکانی نیشتەجێبوونی جوولەکەکان لە کەرتی ڕۆژئاوا، دەرئەنجامی جیدی لێدەکەوێتەوە.

 
ئەمەش بزانە: لەنێو واژۆکارانی نامەکەدا، زیاتر لە 10 دیپلۆماتکاری پێشوو، بەرپرسی خانەنشینی وەزارەتی دەرەوە، بەرپرسانی پێشووی پێنتاگۆن، هەواڵگری و کۆشکی سپی هەن. یەک لەو کەسانەش ئانتۆنی لەیک، راوێژکاری ئاسایشی نیشتمانیی ئەمریکای سەردەمی بیل کلینتۆنە. 

 

باکگراوند: ئەم نامەیە لەکاتێکدایە بەهۆی هێرشەکانی ئیسرائیل بۆ سەر کەرتی غەززە زیاتر لە 31 هەزار کەس کوژراون و ئیسرائیل پلانی هەیە هێرش بکاتە سەر شاری ڕەفە‌ح، ئەو کەرتەی بووەتە پەناگەی ئاوارەکانی باکووری غەززە.