وەزارەتی دارایی و سامانە سرووشتییەکان بۆ چارەسەرکردنی کێشەی مووچە ڕادەسپێردرێن

ئاڤا نیوز

ئەنجوومەنی وەزیرانی هەرێمی کوردستان كۆبووەوە و چەند پرسێكی تاووتوێ كرد، لەمیانەدا هەردوو وەزارەتی دارایی و ئابووری و سامانە سروشتییەکانی ڕاسپارد بۆ بەردەوامیدان بە گفتوگۆکانیان لەگەڵ هاوتاکانیان لە حکومەتی فیدراڵ بە ئاراستەی گەیشتن بە لەیەکتر گەیشتنی هاوبەش لە پێناو دابینکردنی مووچە و شایستە داراییەکانی هەرێمی کوردستان.

چیرۆکی سەرەکی: ئەمڕۆ چوارشەممە 25-6-2025، بە سەرپەرشتیی سەرۆکوەزیران مەسرور بارزانی و ئامادەبوونی قوباد تاڵەبانی، جێگری سەرۆکوەزیران، ئەنجوومەنی وەزیرانی هەرێمی کوردستان لەبارەی کێشەکانی نێوان هەولێر و بەغدا، بە تایبەت لەبارەی مووچە و شایستە داراییەکانی هەرێمی کوردستان کۆبووەوە.

ڕاگەیێنراوی فەرمی: ئەنجوومەنی وەزیرانی هەرێمی كوردستان ڕایگەیاند: لەمیانەی كۆبوونەوەكەدا وەزیری دارایی و ئابووری ڕاپۆرتێكی فراوانی سەبارەت بە داهات و خەرجییەكان بۆ ساڵی 2025 خستە ڕوو و بە وردی باسی لە سەرچاوەی داهاتەكانی هەرێمی كوردستان كرد و ڕوونكردنەوەی پێویستی لەمبارەیەوە دا.

- لە چوارچێوەی ڕاپۆرتەكەی وەزیری داراییدا، چەند پێشنیازێک خرانەڕوو بۆ کەمکردنەوەی خەرجییەکانی بەکاربردنی وەزارەتەکان، بە ئاراستەی ئەوەی کاری لە پێشینە بۆ دابینکردنی شایستەکانی مووچەخۆران بێت کە پێشەنگی بایەخی حکومەتی هەرێمی كوردستانە.

- لە كۆبوونەوەكەدا سەرۆكوەزیران مەسرور بارزانی بە ناوی ئەنجومەنی وەزیرانەوە، پێزانینی بۆ خۆڕاگری و پشوودرێژی مووچەخۆران و خەڵکی هەرێمی کوردستان دەربڕی کە بە هۆی نەناردنی شایستە داراییەکانیان لەلایەن حکومەتی فیدراڵەوە، لە دۆخێکی دارایی سەختدان و ئەنجوومەنی وەزیران تێگەیشتنی تەواوی بۆ بارودۆخی ناهەمواری هاووڵاتیيان هەیە بەهۆی ئەم ڕێکارە ناڕەوایانەوە.

- سەرۆكوەزیران مەسرور بارزانی دڵنیاییشی دا کە هەموو هەوڵێک دەدەن مافەکانی فەرمانبەران نەفەوتێ و لە گفتوگۆکانیش لەگەڵ حکومەتی فیدراڵ بەردەوامن بۆ ئەوەی لە ماوەیەکی نزیکدا، بگەنە چارەسەرێک بۆ کێشەی مووچە.

- سەرۆکوەزیران ڕوونیکردەوە، بۆ چارەسەرکردنی ئەم کێشەیە، بڕیارە شاندێکی حکومەتی فیدراڵ لەم ڕۆژانە سەردانی هەولێر بکات.

- ئەنجوومەنی وەزیران جەختی کردەوە لەسەر کارکردنی بەردەوام لە پێناوی دابینکردنی مووچە و شایسەتە داراییەکانی مووچەخۆرانی هەرێمی کوردستان، بۆ ئەم مەبەستەش، ئەنجوومەنی وەزیران هەردوو وەزارەتی دارایی و ئابووری و سامانە سروشتییەکانی ڕاسپارد کە بەردەوام بن لە گفتوگۆکانیان لەگەڵ هاوتاکانیان لە حکومەتی فیدراڵ بە ئاراستەی گەیشتن بە لەیەکترگەیشتنی هاوبەش لەسەر ئەم بابەتە.

- ئەنجوومەنی وەزیران پێشوازی لە دەستپێشخەری سەردانی شاندی حکومەتی فیدراڵ دەکات بۆ هەولێر بۆ چارەسەرکردنی کێشەکە.

- ئەنجوومەنی وەزیران جەختی لە گرنگیی ڕێکخستنەوەی خەرجی بەکاربردن و نەسریەی وەزارەت و دامودەزگاکان و پێداچوونەوە بە بوارەکانی ئەم خەرجییانە كردەوە، بۆ ئەم مەبەستەش، لیژنەیەک ڕاسپێردرا کە بە هامەهەنگی لەگەڵ وەزارەتە پەیوەندیدارەکان، پێداچوونەوانە بە داهات و خەرجی بەکاربردنی وەزارەت و دامودەزگاکان بکەن.