لە دانیشتنی داهاتووی پەرلەمان خواستێكی سوننەكان جێبەجێ دەكرێت

ئاڤا نیوز

 

ڕۆژی یەکشەممە  2024-3-24، پەرلەمانی عێراق كۆدەبێتەوە و بڕیارە تێیدا دەنگ لەسەر هەمواری پەیڕەوی ناوخۆی پەرلەمان بدرێت، كە ئەوەش خواستی سوننەكانە تا بتوانن بەربژێرەكەیان بۆ پۆستی سەرۆكی پەرلەمان بگۆڕن.

چی ڕوودەدات: لایەنەکانی سوننە کار لەسەر هەموارکردنەوەی پەیڕەوی ناوخۆی پەرلەمانی عێراق دەکەن و بۆ ئەم مەبەستە بە زۆرینەی ده‌نگ بڕگەیەک بۆ دانیشتنی داهاتوو  زیادکراوە، هەموارەکە دەرچەیەک بۆ چارەسەرکردنی کێشەکە دەکاتەوە، دەرگای خۆپاڵاوتن سەرلەنوێ دەکرێتەوە بۆ ئەوەی لایه‌نه‌كان بتوانن بەربژێرەكەیان بگۆڕن. 

ڕاگەیێنراوی فەرمی: یەکشەممەی داهاتوو پەرلەمانی عێراق کۆدەبێتەوە و تێیدا دەنگدان و خوێندنەوە بۆ چەند پرۆژە یاسایەک دەکات، یەکێک لەوانەش، خوێندنەوەی سێیەم بۆ هەمواری یاسایی قەدەغەکردنی بازرگانی کردن بە جەستەی مرۆڤ، کە لەلایەن لیژنەی تەندروستییەوە ئامادە کراوە. بەشی ڕاگەیاندنی ئەنجوومەنی نوێنەرانی عێراق ئەمەی ڕاگەیاند. 

زانیاریی زیاتر: لە کۆبوونەوەکە پەرلەمانتاران دەنگ بە هەمواری یاسای وەبەرهێنانی پیشەسازی لە کەرتی تایبەت دەدەن، هاوکات خوێندنەوەی یەکەم بۆ هەمواری یاسای پێکهێنانی پەرلەمانی عێراق دەکرێت، چەند پرۆژە یاسایەکی دیکەش خوێندنەوەیان بۆ دەکرێت.

وێنە گەورەکە: دوای دوورخستنەوەی محەممەد حەلبووسی له‌ مانگی 11ی ساڵی 2023 ەوە، پەرلەمانی عێراق بێ سەرۆکە،  پۆستەکە بەرکەوتەی پێکهاتەی سوننەیە و  کاریش بۆ ئەوە دەکرێت هەر لای هاوپەیمانیی تەقەدوم بمێنێتەوە.