وردبینی لیستی مووچە دوای هاتنی شاندی باڵا بۆ هەولێر دەست پێدەکات

ئاڤا نیوز

 

شاندێکی تەکنیکی وەزارەتی دارایی و ئابووری هەرێمی کوردستان لە بەغدان، لیستی مووچەی مانگی شەشیان ڕادەست کردووە و بڕیارە دوای هاتنی شاندی باڵای بەغدا بۆ هەولێر، پرۆسەی وردبینی دەست پێبکات.

 

وێنە گەورەکە: سەرۆکوەزیران مەسرور بارزانی و سوودانی، سەبارەت بە چارەسەری کێشەی مووچەی مووچەخۆرانی هەرێمی کوردستان قسەیان کردووە و بڕیارە لە ڕۆژانی داهاتوو شاندێکی باڵای عێراق سەردانی هەولێر بکەن، هەڵوەستە لەسەر چارەسەرەکانی بکرێت.

 

زانیاریی تایبەت: سەرچاوەیەک لە وەزارەتی دارایی و ئابووری هەرێمی کوردستان بە ئاڤای گوت، "پرۆسەی وردبینی لە لیستی مووچەی مانگی شەش هێشتا دەستیپێنەکردووە، ئەو پرۆسەیە دەکەوێتە دوای هاتنی شاندە باڵاکەی عێراق بۆ هەولێر."

 

ئەمەش بزانە: وەزارەتی دارایی عێراق، تاوەکو ئێستا هیچ بڕە پارەیەکی بۆ دابینکردنی مووچەی مانگی پێنجی مووچەخۆرانی هەرێمی کوردستان خەرجنەکردووە، بەڵام وەزارەتی دارایی و ئابووری حکومەتی هەرێمی کوردستان دەیەوێت وەک ئەرکی سەرشانی خۆی مانگانە لیستی مووچە ئامادە بکات و بیداتە بەغدا، بۆ ئەوەی لەگەڵ چارەسەربوونی کێشەکە پارەی ئەو مانگانە خەرج بکرێت.