پارەدان و باج لە فەرمانگە حکومییەکانی عێراق بەئەلیکترۆنی دەکرێت

ئاڤا نیوز

 

بڕیارە لە سەرەتای مانگی تەمموزی داهاتووەوە مامەڵەی پارەدان و باج  لە هەموو فەرمانگە حکومییەکانی عێراق بەئەلیکترۆنی بکرێت و پارەدان بەشێوەی کاش نەمێنێت، لەبەرامبەردا هۆشداری دەدرێت، لەوەی ئەم بابەتە بۆ مەرامی قازانج و گەندەڵی بەکاربهێنرێت.

 

چیرۆکی سەرەکی: لە سەرەتای مانگی حوزەیرانی ڕابردوو، ساڵح سەلمان، ڕاوێژکاری سەرۆکوەزیرانی عێراق ئاشکرایکرد، عێراق پێشکەوتنی بەرچاوی لە وەرگرتنی سیستمی پارەدانی ئەلیکترۆنی بەدەستهێناوە،  ئاماژەی بەوەشکرد، لە مانگی تەمموزی 2025 ـەوە مامەڵەی پارەدانی هاووڵاتیان بە حکومەت بەشێوەی ئەلیکترۆنی بەڕێوەدەچێت و کاش نامێنێت.

 

كاریگه‌ریی و لێكه‌وته‌كان: بەشێک لە شارەزایانی ئابووری هۆشداری دەدەن لەوەی کەسانێک بۆ مەرامی قازانج ئەم هەلە بقۆزنەوە بەتایبەتی بەرامبەر ئەو هاووڵاتیانەی هەژماری بانکی و شارەزاییان لەم جۆرە مامەڵەیە نییە.

 

ئه‌وه‌ی پێشبینی ده‌كریت: ئەو شارەزایانە پێیان وایە، ڕەنگە ئەم پرۆژەیە ببێتە هۆی فۆرمێکی نوێی قازانج، چونکە هەندێک لە فەرمانبەران یان کەسانێک نزیک دامەزراوە و بەڕێوەبەرایەتییەکانی حکومەت کارتی خۆیان بۆ هاووڵاتیان بەرامبەر بڕە پارەیەک بۆ قازانج بەکاربهێنن.

 

قوڵتر: بۆ نموونە، ئەگەر باجی خزمەتگوزارییەکی حکومی بە 20 هەزار دینار دیاری کرابێت، ئەو کەسانە بە 22 هەزار دینار یان زیاتر بە هاووڵاتیانی دەفرۆشنەوە.