لە مەندەلی 400 ئاسکی دەگمەن "بەشێوەیەکی گوماناوی" دیار نامێنن

ئاڤا نیوز

قایمقامی قەزای مەندەلی لە پارێزگای دیالە، هۆشداری دەدات لە دیارنەمانی نزیکەی 400 ئاسکی دەگمەنی جۆری "ڕیم" لە پارێزگاکەدا بە شێوەیەکی گوماناوی.

لێدوانی فەرمی: عەلی زمەد زوهێری، قایمقامی قەزای مەندەلی بە میدیای عێراقی ڕایگەیاندووە، "ناوچە پارێزراوەکانی ئاسکی ڕیم لە مەندەلی، زیاتر لە 400 ئاسکی تێدابوو. لە ساڵانی ڕابردوودا بەشێوەیەکی بەرچاو زیادیان کردبوو، بەڵام بە شێوەیەکی چاوەڕواننەکراو و لە ماوەیەکی کورتدا دیارنەمان و ئێستا تەنیا نزیکەی 10 ئاسک ماونەتەوە."

زانیاریی زیاتر: قایمقامی قەزای مەندەلی، ئاماژەی بەوەشکردووە کە هۆکاری دیار نەمانەکەیان نادیارە، هەرچەندە بیانووی ئەوە دەهێنرێتەوە کە بەهۆی برسێتییەوە لەناوچوون، بەڵام ئەمە جێگەی گومانە، چونکە مەحاڵە ئەو ژمارە زۆرە بەو خێراییە لەناوبچن. بۆیە گومانی دزین و بەقاچاخبردنیان لێدەکرێت.

قایمقامی مەندەلی داوای لە دەسەڵاتە باڵاکانی حکومەت کردووە بەپەلە لێکۆڵینەوە لەم دۆسیەیە بکەن بۆ ئاشکراکردنی ڕاستییەکان و سزادانی لایەنی کەمتەرخەم، هەروەها کاربکەن بۆ بوژاندنەوەی پارێزگەکە.

باکگراوند: ئاسکی ڕیمی عێراقی لە دوای ساڵی 2003ـەوە لە ناوچەکانی ئەنبار و دیالە ڕووبەڕووی هەڵمەتی ڕاوکردنی نایاسایی و لەناوبردن بووەتەوە، ئەمەش وایکردووە مەترسیی لەسەر لەناوچوونیان زیاتر ببێت.