دوو ئابڕووچوونی ئەخلاقی و ئەمنی عێراق دەهەژێنن

ئاڤا نیوز

 دوو دۆسیەی ئابڕووچوون لە چەند ڕۆژی ڕابردوودا، هەردوو وەزارەتی ناوخۆو خوێندنی باڵای عێراق دەهەژێنن و کاردانەوەی زۆریان لێدەکەوێتەوە.

چیرۆكی سەرەكی: چەند ئەفسەرێکی  وەزارەتی ناوخۆ، لە فەیسبووک بە پەیجی ساختە هەڕەشەی ئاشكراكردنی نهێنییان لە هاوڕێكانی خۆیان کردووەو پارەیان لێسەندوون.

زانیاریی بەدەستهاتوو: بەپێی زانیارییەکانی ڕۆژنامەی شەرقلئەوسەت، محەممەد شیاع سوودانی سەرۆكوەزیرانی عێراق لیژنەی لێکۆڵینەوەی پێکهێناوە، ژمارەیەک ئەفسەر ڕەوانەی لێکۆڵینەوە کراون، دیارترین ئەو ئەفسەرانەش فەریق ڕوکن سەعد عەلاق سەرۆکی زانکۆی توێژینەوەو ستراتیژی و لیوا سەعد مەعن بەڕێوبەری  پێشووی پەیوەندی و ڕاگەیاندنی وەزارەتی ناوخۆیە،17 ئەفسەر دانیان ناوە بەوەی دوو ئەفسەر، شەش پەیجی ساختەیان لەفەیسبووک بەڕێوە بردووە.

لەلایەكی دیكەوە: چیرۆكی ئابڕووچوونی دووەم بەمشێوەیەیە: هێزێکی ئەمنی عیماد شەعلان شاوی،  ڕاگری کۆلێژی کۆمپیوتەریان دەستگیرکرد، لە ژوورەکەی دەستدرێژی سێکسی کردووەتەوە سەر قوتابییەکی خۆی و وێنەکانیشی لە تۆرە کۆمەڵایەتییەکان بڵاوبوونەتەوە، وەزارەتی خوێندنی باڵای عێراق شاويیان لە پۆستەکەی دوور خستەوەو لێکۆڵینەوەی لەگەڵ دەکرێت.