وەزارەتی دارایی ڕوونکردنەوە لەبارەی شێوازی خانەنشینبوونی فەرمانبەرانی گرێبەست دەدات

ئاڤا نیوز

دوای دەرچوونی بڕیاری خانەنشینکردنی فەرمانبەرانی گرێبەست، بەشێکی زۆریان لایان ڕوون نییە لەسەر چ بنەمایەک خانەنشین دەکرێن، وەزارەتی داراییش لەو بارەیەوە ڕوونکردنەوە دەدات.

 

چیرۆکی سەرەکی: زیاتر لە 500 کارمەندی دەزگای گشتیی مین، کە بەشێوەی گرێبەست دامەزراون، بەپێی پسپۆری مووچەکانیان دیاریکراوە، دوای دەرچوونی بڕیاری خانەنشینی نازانن لەسەر چ بنەمایەک خانەنشین دەبن و مووچەکانیان چەند دەبێت.

 

وێنە گەورەکە: فەرمانبەرانی گرێبەست هاوشێوەی فەرمانبەرانی هەمیشەیی خانەنشین دەكرێن، وەزارەتی دارایی کوردستان داوای لە سەرجەم وەزارەت و فەرمانگەکان کردووە دۆسیە ئەو فەرمانبەرانە ئامادە بکەن کە خانەنشینبوون دەیانگرێتەوە. لەمەودوا 10% لە مووچەی ئەوانیش بۆ خانەنشینی دەبڕدرێت، قەرزی ساڵانی ڕابردووشیان لێ وەردەگیرێتەوە.

 

لێدوانی فەرمی: سەرچاوەیەک لە وەزارەتی دارایی و ئابووری هەرێمی کوردستان بە ئاڤای گوت، "بەگوێرەی ڕێنمایی ژمارە 10ی ساڵی 2019 مووچەی بنەڕەتی فەرمانبەرانی گرێبەست دیاریدەکرێت، کەمترین مووچە 250 هەزار و زۆرترینی بەگوێرەی بڕوانامە یەک ملیۆن و 250 هەزار دینارە."