دادگای فیدراڵی شێوازی کارکردنی دەگۆڕێت و لەمەودوا بە دەگمەن نەبێ فەرمان سالاری دەرناکات

ئاڤا نیوز

دوای زیاتر لە دوو هەفتە ئاڵۆزییەکانی ناو دادگای فیدراڵی، سەرئەنجام دادوەر مونزیر ئیبراهیم حوسێن، سەرۆکی نوێی دادگای فیدراڵی دەستبەکار بوو. لەبەردەم لەتیف ڕەشید، سەرۆککۆماری عێراق سوێندی یاسایی خوارد و بڕیاریشە هەفتەی داهاتوو دادگا بکەوێتەوە سەر پێی خۆی.

مونزیر ئیبراهیم حوسێن، لە کاتی سوێندخواردن پابەندبوونی خۆی بە سەربەخۆیی دادگا دەربڕی و وتی دەبێت دادگا لەهەر دەستوەردانێک بە دوور بێت.

وێنە گەورەکە: دوای دەست بەکاربوونی سەرۆکی نوێی دادگای فیدراڵی، چاوەڕوانیەکان ئەوە بوون، ئەمر وەلائی لەبارەی مووچەی فەرمانبەرانی کوردستان دەربکات، بەڵام پێدەچێت ئەم پرسە بگوازرێتەوە بۆ دادگای پێداچوونەوە، بەو پێیەی دادگای فیدراڵی ئاراستەی کارکردنی وەکو پێشوو نابێت.

لێدوانی فەرمی: دادوەرێکی دادگای فیدراڵی بە ئاڤا میدیای ڕاگەیاند: ڕۆژی دووشەممەی هەفتەی داهاتوو 2025-07-07، دادگا یەکەم دانیشتنی بە سەرۆکایەتی دادوەرە نوێیەکە دەکات.

زانیاریی زیاتر: لەبارەی پرسی مووچەی خەڵکی کوردستان کە سکاڵایان لە دادگاکە تۆمارکردووە و چاوەڕوانی فەرمانی وەلائی بوون، دادوەرەکەی دادگای فیدراڵی گوتی، هێشتا نازانرێت ئەو داوایەی کۆمەڵێک فەرمانبەری هەرێمی کوردستان تۆماریان کردبوو چۆن مامەڵەی لەگەڵ دەکرێت. بەڵام ئەوەی دیارە ئەوەیە دادگای فیدراڵی ئاراستەی کارکردنی وەکو پێشوو نابێت، لەمەوبەدوا زۆر بە زەحمەت ئەمر وەلائی دەردەکات، لەبەرئەوەی پسپۆڕانی یاسایی ڕوونکردنەوەیان داوە، ئەمر وەلائی زیاتر لەگەڵ دادگای دەستووری دەگونجێت نەوەک دادگای فیدڕاڵی. ئەمە جگە لەوەی پێشتر دادگا بڕیاری هەبووە لەسەر مووچەی فەرمانبەران.

ئەوەی پێشبینی دەکرێت: بە گوتەی دادوەرەکە، پیشبینی دەکرێت دادگا لەبری ئەمری وەلائی، دەرفەت بداتە شاندی هەرێمی کوردستان و بەغدا بۆ ئەوەی بگەنە ڕێککەوتن.