هۆکاری دواکەوتنی هاوکاری دارایی هاوپەیمانان ئاشکرا دەکرێت

ئاڤا نیوز

هاوکاری دارایی هاوپەیمانان ئامادەیە، بڕیاربوو سبەی یەکشەممە دابەش بکرێت، بەڵام بەهۆی پشووەوە ئەوانەی بە 'هەژماری من' وەریدەگرن دەچێتە ڕۆژی دووشەممە، ئەوانەشی بە کاشە سبەی یەکشەممە وەریدەگرن.

چیرۆکی سەرەکی: لەم مانگەدا، 64 هەزار  244 ئەفسەر و پلەدار و پێشمەرگە لە ڕێگەی پڕۆژەی 'هەژماری من'' هاوکاری دارایی هاوپەیمانان وەردەگرن، بەهۆی ئەوەی سبەی لە بانکی ناوەندیی عێراق پشووی فەرمییە، دابەشکردنی هاوکاری دارایی ئەفسەر و پلەدار و پێشمەرگەکان ڕۆژێک دوا دەکەوێت.

لێدوانی فەرمی: سەرچاوەیەک لە وەزارەتی پێشمەرگە بە ئاڤای گوت، "تا دوێنی ئێوارە لەگەڵ بانکی ناوەندی لەسەر هێڵ بووین بۆ ئەوەی سیستەمەکە بەهەر جۆرێک بێت سبەی بکرێتەوە و پێشمەرگەکان بتوانن لە ڕێگەی ئامێرەکانی ATM هاوکارییەکە ڕابکێشن، بەڵام نەکرا و ڕۆژی دووشەممە لەگەڵ دەستپێکردنەوەی دەوام دەتوانن هاوکارییەکە ڕابکێشن."

زانیاریی زیاتر: ئەم دواکەوتنە تەنیا بۆ ئەو ئەفسەر و پلەدارانەیە کە لەڕێگەی 'هەژماری من' مووچە وەردەگرن، ئەوانەی پەیوەستن بە بانکە بازرگانییەکانی هەرێمی کوردستان و بەکاش هاوکارییەکەیان پێدەدرێت، دەتوانن سبەی لە بانکەکان هاوکارییەکە وەرگرن.