ئاگرێکی گەورە لە سنووری قەرەداغ و گاپیلۆن لە سلێمانی 600 دۆنم دارستانی سووتاندووە

ئاڤا نیوز

 

بە هۆی دوو ئاگری گەورە لە سنووری قەزای قەرەداغ و ناحیەی گاپیڵۆن سەدان دۆنم پووش و پاوان و دارستان سووتاون.

 

چیرۆکی سەرەکی: لە ڕۆژی دووشەممەوە ئاگرێکی گەورە لە بەرزاییەکانی پشت گوندی جافەران لە سنووری قەرەداغ لە پارێزگای سلێمانی کەوتووەتەوە، تا ئێستاش نەتوانراوە کۆنتڕۆڵ بکرێت، لە ناحیەی گاپیڵۆنی سنووری قەزای شارباژێڕیش نزیکەی 600 دۆنم پووش و پاوان و دارستان سووتان.

 

لێدوانی فەرمی: شیرین مەحموود، قایمقامی قەزای قەرەداغ بە ئاڤا میدیای گوت: تیمەکان لە هەوڵی کۆنتڕۆڵ کردنی ئاگرەکەن، بەڵام بەهۆی سەختی ناوچەکە نەتوانراوە کۆنتڕۆڵ بکرێت و بکوژێنرێتەوە.

 

زانیاریی پەیامنێر: چۆمان مەحموود، پەیامنێری ئاڤا میدیا گوتی: لە دوێنێ کاتژمێر 11ی بەیانییەوە ئەو ئاگرە کەوتووەتەوە، ناوچەکە سەختە و هیچ ئۆتۆمبێلێکی ئاگرکوژێنەوە ناگاتە شوێنی ئاگرەکە، ئەمەش کۆنتڕۆڵ کردنی سەخت کردووە. 

 

لەلایەکی دیکەوە: بەڕێوەبەرایەتیی پۆلیسی دارستان و ژینگەی پارێزگای سلێمانی ڕایدەگەیەنێت: ئاگرەکەی گاپیڵۆن لەلایەن بنکەی پۆلیسی دارستانی گاپیڵۆن کۆنتڕۆڵ کرا، بەڵام بەهۆی ئەو ئاگرە نزیکەی 600 دۆنم پووش و پاوان و دارستان سووتاون.