پلانی چوارچێوەی هەماهەنگی بۆ خستنی سوودانی ئاشکرا دەبێت

ئاڤا نیوز

چوارچێوەی هەماهەنگی هەوڵی ڕێکخستنەوەی ڕیزەکانی دەدات بۆ ئەوەی ڕێگری بکات لە سەرکەوتنی محەممەد شیاع سوودانی لە هەڵبژاردنی داهاتووی پەرلەمانی عێراق.

وێنە گەورەکە: بەشێک لە سەرکردەکانی چوارچێوەی هەماهەنگی پلانیان بۆ خستنی سوودانی داناوە، بەهۆی ئەوەی ترسیان هەیە هاوپەیمانێتییەکی سیاسی نوێ پێکبهێنێت، بەشداری هەڵبژاردنی داهاتوو بکات و دەنگی زۆرینەی شیعە بەدەستبهێنێت.

 زانیارییە بەدەستهاتووەکان:  بەپێی ڕاپۆرتێکی میدیاکانی ئەمریکا، پوختەی پلانەکە بریتییە لە؛ هێرشەکانیان بۆ سەر سەرۆکوەزیران چڕ بکەنەوە، لە دەستکەوتەکانی کەم بکەنەوە، لەڕووی جەماوەرییەوە بیخەن و کێشەی سیاسی و ئابووری بۆ دروست بکەن.

دواتر خۆپیشاندان دەستپێبکات و داوای دەست لەکار کێشانەوەی حکومەت بکەن، پاشان داوای هەڵبژاردنی پێشوەخت بکرێت، لە کۆتاییدا سوودانی نەبێتەوە سەرۆکوەزیران یان هیچ پۆستێکی باڵای پێنەدرێت.

ئەوەی پێویستە بیزانیت: ئەم ڕاپۆرتەی میدیا ئەمریکییەکان دوای ئەوە دێت، نووری مالیکی، سەرۆکی هاوپەیمانیی دەوڵەتی یاسا پێشنیازی کردووە یاسای هەڵبژاردن هەموار بکرێتەوە.

زانیاریی زیاتر: یەکێک لەو ماددانەی هەموار دەکرێت بەرپرسی جێبەجێکار پابەند دەکات بەوەی ئەگەر نیازی هەیە بەشداری لە هەڵبژاردن بکات، دەبێت شەش مانگ پێشتر دەستبەرداری پۆستەکەی بێت، لەگەڵ ئەوەی ئەگەر هەیە ئەمساڵ هەڵبژاردنی پێشوەخت بکرێت.