فایلی خەڵک؛ کەسێک ڕۆژانە لەڕێگەی کردنەوەی ئاگر خەڵکی کەسنەزان بێزار دەکات

ئاڤا نیوز

لە ناحیەی كەسنەزانی هەولێر، كەسێك بەهۆی کردنەوەی ئاگر چەند گەڕەكێكی بێزار و هەراسان كردووە، بەڕێوەبەری شارەوانی کەسنەزانیش دەڵێت، هەر کەسێک زانیاری لەسەر ئەو شۆفێرە هەیە با پەیوەندیمان پێوە بکات.

چیرۆکی سەرەکی: لە ناحیەی كەسنەزان بە دیاریكراوی لە گەڕەكەكانی پشت ناوچەی پیشەسازی كەسنەزان ، کەسێک کە ئۆتۆمبێلێکی پیکابی پێیە، زبڵ و خاشاک و پلاستیک كۆدەكاتەوە، هەر ئێوارەیەک ئەو زبڵ و خاشاکە لە شوێنێک دەسووتێنێت، بە دووكەڵەكەی دانیشتووانی گەڕەكەكانی ئەو ناوچەیە هەراسان دەكات.

لێدوانە فەرمییەکان:

سائیب هاڕوون، بەڕێوەبەری ناحیەی کەسنەزان بە ئاڤای ڕاگەیاند، دوای ئەوەی ئاڤا پەیوەندی پێوەکردین، دەستبەجێ لیژنەی بەدواداچوونمان لە شارەوانی کەسنەزان ڕەوانەی شوێنەکە کرد، دەرکەوت شۆفێری پیكابێت ئەم كارە دەكات، چەند تولەڕێیەكی دۆزیوەتەوە و بەوێدا دەچێتە پشتەوەی ئەو گەڕەكانە و ئەو زبڵ و خاشاكە دەسووتێنێت، ئیتر ڕاستەوخۆ تیمەکانی شارەوانی تولەڕێیەكەیان داخست.

عەلی ڕەشاد موستەفا، بەڕێوەبەری شارەوانی کەسنەزان بە ئاڤای وت، ئەو شوێنە کۆتایی شەقامی 150 مەترییە و پێشتر ڕێگاکانمان هەمووی داخستبوو، بەڵام شۆفێری پیکابەکە سوودی لە بۆشاییەک وەرگرتبوو، ئێواران ئاگری لەو شوێنە دەکردەوە، پێشتریش لە چەند شوێنێکی دیکە زبڵ و خاشاکی سووتاندبوو، خەڵکی زۆر بێزار کردبوو،  بۆیە ئێمە سکاڵامان لەسەری تۆمار کردووە، لەسەر سکاڵای ئێمە فەرمانی دەستبەرداگرتن بۆ ئۆتۆمبێلەکە دەرکراوە،  فەرمانەکەش ڕەوانەی پۆلیسی هاتووچۆ کراوە.

بەڕێوەبەری شارەوانی کەسنەزان دەشڵێت، هەر کەسێک زانیاری لەسەر شۆفێری ئەو پیکابە هەیە یان هەر کەسێکیان بینی سەرپێچی دەکات، بەتایبەت فڕێدان و سووتاندنی زبڵ و خاشاک، با پەیوەندیمان پێوە بکات، دەستبەجێ ڕێکاری پێویست دەگرینەبەر.