نەتەوە یەکگرتووەکان: خۆڵبارین بووەتە هەڕەشەیەکی گەورە لەسەر ئاسایشی خۆراک و ئابووری عێراق

ئاڤا نیوز

لە ڕۆژی جیهانی بەرەنگاربوونەوەی زریانی خۆڵبارین، نەتەوە یەکگرتووەکان ڕایگەیاندووە، زریانەکانی تۆز و خوڵ (خۆڵبارین) زیادیان کردووە و هەڕەشەیەکی زۆری لەسەر تەندروستی و ئاسایشی خۆراک و ئابووری عێراق و ناوچەکە دروستکردووە.

وێنە گەورەکە: نەتەوە یەکگرتووەکان ڕۆژی 12ـی تەمموزی هەموو ساڵێکی وەک ڕۆژی بەرەنگاربوونەوەی زریانەکانی تۆز و خۆل دیاریکردووە. بە گوێرەی ئامارەکان 25%ـی زریانەکانی تۆز و خۆڵ یان خۆڵبارین بەهۆی زیادبوونی چالاکییەکانی مرۆڤەوە دروست دەبن، ئەمە جگە لەوەی ئێستا دیاردەکە بۆ دوو هێندە زیادی کردووە.

لێدوانی فەرمی: غولام ئیسحاق زەی، ڕێکخەری نیشتەجێی نەتەوە یەکگرتووەکان لە عێراق ڕایگەیاند، "هەڕەشەکانی زیادبوونی زریانەکانی تۆز و خۆڵ لەسەر عێراق زیادیان کردووە، بە تایبەت بۆسەر ئاسایشی خۆراک، تەندروستی و ئابووری، تەنانەت لەماوەی ساڵی 2022 لە کۆی 365 ڕۆژ زیاتر لە 120 زریانی تۆز و خۆڵ لە عێراق هەڵیکردووە. ساڵ دوای ساڵ ئەو ژمارەیەش زیاد دەکات و کاریگەرییەکانی بۆسەر ژینگە و کشتوکاڵ زیاتر دەبێت".

لەلایەکی دیکەوە: بەپێی بەدواداچوونی د.ڕێبەر مزوری،  پسپۆڕی ژینگە لەماوەی دوو مانگی ڕابردوودا نەخشەی مانگە دەستکردەکان دەریدەخات، لە شاری هەولێر لە کۆی 65 ڕۆژ واتا لە 2025-05-01 تاوەکو ڕۆژی 2025-07-04، زیاتر لە 45 ڕۆژ تۆز و خۆڵ هەبووە.

ئەوەی پێویستە بیزانیت: ئەمساڵ نەتەوەیەکگرتوەکان ئامارێکی لەبارەی تێکچوونی ژینگەی عێراق بڵاوکردەوەتەوە، لە ئامارەکە هاتووە، تا ساڵی 2030 لەماوەی پێنج ساڵی ئایندە، لە کۆی 365 ڕۆژی ساڵ، 270 ڕۆژی دەبێتە خۆڵبارین.