خۆڵ و خاشاک لە گۆڕستانەکانی سلێمانی فڕێدەدرێت

ئاڤا نیوز

شارەوانی سلێمانی چەند وێنەیەکی یەک لە گۆڕستانەکان بڵاوکردووەتەوە کە پاشماوەی خوڵ و خاشاکی تێدا کۆبووەتەوە، وتەبێژی شارەوانیش دەڵێت: تیم بۆ پاککردنەوەی گۆڕستانەکان دانراوە.

چیرۆکی سەرەکی: لە پەڕەی فەرمی شارەوانی سلێمانی چەند وێنەیەکی یەکێک لە گۆڕستانەکان ئەو شارە بڵاوکراوەتەوە کە پاشماوەی پیسی تێدا کۆبووەتەوە، ئەمەش کاردانەوەی هاووڵاتییانی لێکەوتووەتەوە. 

لێدوانی فەرمی: زەردەشت ڕەفیق، وتەبێژی شارەوانی سلێمانی بە ئاڤا میدیای ڕاگەیاند: ئەو عارەبانانەی لە نزیک گۆڕستانەکان شت دەفرۆشن، دواتر پاشماوەکانیان فڕێ دەدەن، ئەو کەسانەشی دەچن بۆ سەر گۆڕی کەسوکاریان و خوارن و شت لەگەڵ خۆیان دەبەن، پێویستە پاشماوەکانیان دوای خۆیان کۆبکنەوە نەک لە گۆڕستانەکان فڕێی بدەن.

وتەبێژی شارەوانی سلێمانی وتیشی: لیژنەی گۆڕستانەکانمان هەیە، هەموو ڕۆژانی شەممە تیمەکانمان دەچن ئەو پاشماوانەی لە گۆڕستانەکان هەیە پاکی دەکەنەوە.