سەرکردەیەکی دەوڵەتی یاسا: لە چەند ڕۆژێکی کەمدا پرسی مووچە چارەسەر دەکرێت

ئاڤا نیوز

 

ڕاوێژکارێکی هاوپەیمانی دەوڵەتی یاسا بە ئاڤا میدیای ڕاگەیاند، هەوڵەکان بۆ چارەسەرکردنی کێشەی مووچەی فەرمانبەرانی کوردستان چڕکراونەتەوە و لە چەند ڕۆژێکی کەمی داهاتوودا کێشەکە چارەسەر دەکرێت.

وێنە گەورەکە: زیاتر لە 70 ڕۆژە بەغدا مووچەی فەرمانبەرانی کوردستانی ڕاگرتووە، سەرەڕای هەوڵەکانیش لە ئەنجوومەنی وەزیرانی عێراق، دادگای فیدڕاڵی و پەرلەمانی عێراق بەڵام تائێستا بڕیاری ناردنی مووچە نەدراوە، دوێنێش بارەگای بارزانی بڵاویکردەوە،  لە بەغداوە بەڵێنی چارەسەرکردنی پرسی ناردنی مووچە و شایستە داراییەکانی هەرێمی کوردستان لە چەند ڕۆژی داهاتوو دراوە.

 

لێدوانی فەرمی: عەباس موسەوی، ڕاوێژکاری هاوپەیمانی دەوڵەتی یاسا کە نوری مالیکی، سەرۆکوەزیرانی پێشووتری عێراق سەرۆکایەتی دەکات، میوانی گەشتی هەواڵی ڕۆژان بوو ئەوەی خستەڕوو، "پێویستە هەردوولا هەوڵی هاوبەش بدەن هەم حکومەتی هەرێمی کوردستان و هەم حکومەتی فیدڕاڵیش، پێویستە بیر لە کشانەوە لە پرۆسەی سیاسیی و لێک دوورکەوتنەوە نەکەینەوە و دەبێت کێشەکان چارەسەر بکەین، نیازپاکی باش هەیە و هەمووان کۆکین لەسەر ئەوەی نابێت پرسی مووچە تێکەڵ بە کێشەی سیاسی بکرێت".

 

خاڵی ئەرێنییەکان: ئەو ڕاوێژکارەی هاوپەیمانی دەوڵەتی یاسا وتیشی، "دەکرێت مانگێک بۆ سێ مانگ مووچە بنێردرێت و لەو ماوەیەدا لیژنەیەکی باڵا و گەورە بۆ تێپەڕاندنی یاسای نەوت و غاز و چارەسەری کۆی کێشەکانی دیکە پێکبهێنرێت، ئێمە بەبرسیکردنی گەلی کورد ڕازی نین و هەوڵی باش بۆ چارەسەری کێشەکان نراون، بۆیەش ئومێد هەیە کە لە چەند ڕۆژی کەمی داهاتوودا بگەینە ئەنجام".