فایلی خەڵک؛ دانیشتووانی گەڕەکێکی هەولێر ناڕازین لە فڕێدانی زبڵ لە نزیک ماڵەکانیان

ئاڤا نیوز

دانیشتووانی گەڕەکی 94ـی باداوە لە هەولێر ناڕازین لە فڕێدانی زبڵ و خاشاک  لە گۆڕەپانێکی چۆڵی گەڕەکەکەیان، بەڕێوەبەری خزمەتگوزاری لە وەزارەتی شارەوانیش دەڵێت، خەڵک هەست بە بەرپرسیارییەتی ناکەن.

چیرۆکی سەرەکی: دانیشتووانی گەڕەکی 94ـی باداوە لە هەولێر نیگەرانن و دەڵێن، لە گەڕەکەکەمان گۆڕەپانێک هەیە هەندێک خەڵک کردوویانە بەشوێنی فڕێدانی زبڵ و خاشاک، پاشماوەی لێ فڕێ دەدرێت و هەم دیمەنێکی زۆر ناشرینی هەیە هەم بۆنێکی زۆری هەیە.

لێدوانی فەرمی: ژیار جەلال، بەڕێوەبەری خزمەتگوزاری لە وەزارەتی شارەوانی، بە ئاڤای وت، خەڵكانێك هەن هەست بە بەرپرسیارێتی ناكەن و ئەو گۆڕەپانە چۆڵانە دەكەن بە زبڵدان، هەرچەندە تیمەكانمان بەردەوام پاكیان دەكەنەوە، بەڵام جارێكی دیكە پیس دەكرێنەوە و خۆڵ و خاشاکی لێ فڕێ دەدرێت.

زانیاریی زیاتر: ژیار جەلال دەڵێت، هەر سبەی تیمێك دەنێرین و بەدڵنیاییەوە پاكی دەكەینەوە و هیچ زبڵ و خاشاكێكی لێ ناهێڵین، هەر کەسێکیش ببینین لەو گۆڕەپانانە خۆڵ و پاشماوە فڕێ دەدات دەست بەسەر ئۆتۆمبێلەکەیدا دەگرین و سزای دارایشی دەدەین.