ساڵی ڕابردوو زیاتر لە 500 ئامێری لێدانی بیر دەستیان بەسەردا گیراوە

ئاڤا نیوز

ساڵی ڕابردوو زیاتر لە 500 ئامێری لێدانی بیر دەستیان بەسەردا گیراوە، ئاڤا میدیا دوایین زانیاریی لەبارەی چارەنووسی ئەو ئامێرانە ئاشکرا دەکات.

وێنە گەورەکە: بەر لە کابینەی نۆیەمی حکومەتی هەرێمی کوردستان، لێدانی بیر بەشێوەی نایاسایی و دوور لە ڕێنماییەکان لە سەرتاسەری کوردستان ببوو بە دیاردە، بە جۆرێک دەیان بیر وشکبوون و بووە هۆی تێکچوونی ژێرخانی ئاوی چەند ناوچەیەکی دیاریکراو، کە کاریگەریی نەرێنی لەسەر ئەو ناوچانە دروست کرد، بۆیە کابینەی نۆیەم هەوڵەکانی بۆ ڕاگرتنی دیاردەکە خستەگەڕ.

لێدوانی فەرمی: د. کاروان سەباح هەورامی، بەڕێوەبەری گشتیی سەرچاوەکانی ئاوی هەرێمی کوردستان بە ئاڤای ڕاگەیاند: لە کابینەی نۆیەم بابەتی بەکارهێنانی ئاوی ژێر زەویمان ڕێکخستووەتەوە، مۆڵەتی لێدانی بیر بەگوێرەی ڕێنمایی و پێویستیی ناوچەکان بووە، هەروەها سەرپێچیکاران ڕووبەڕووی ڕێکاری یاسایی کراونەتەوە.

زانیاریی زیاتر: بەگوتەی د. کاروان سەباح هەورامی، تەنیا لە ساڵی ڕابردوو لە پارێزگاکانی هەولێر، سلێمانی و دهۆک نزیکەی 500 ئامێری بیر لێدان دەستیان بەسەردا گیراوە، ئامێرەکان پارچە پارچە کراون و وەکو ئاسن توێندراونەتەوە، داهاتەکەشی گەڕێنراوەتەوە بۆ حکومەت.