ناردنی مووچەی مانگی پێنج بە کوێ گەیشت؟

ئاڤا نیوز

 

وەزارەتی دارایی و ئابووریی هەرێمی کوردستان ڕایگەیاند، هەموو ئامادەکارییەک کراوە و چاوەڕوانی ئەوەین، کە بەغدا تەمویلی مووچە بکات، بۆ ئەوەی پارەکە وەربگرین و مووچە دابەش بکەین.

 

بابەتی سەرەکی:  دوای 82 ڕۆژ لە نەناردنی مووچەی فەرمانبەرانی هەرێمی کوردستان، ڕۆژی 22-7-2025، ئەنجوومەنی وەزیرانی عێراق بە سەرۆکایەتیی محەممەد شیاع سوودانی، بڕیاری ناردنی مووچەی فەرمانبەرانی هەرێمی کوردستانی دا. بەڵام تا ئێستا پارەی مووچە نەنێردراوە.

زانیاریی تایبەت: سەرچاوەیەکی باڵا لە وەزارەتی دارایی  و ئابووریی حکومەتی هەرێمی کوردستان بە ئاڤا میدیای ڕاگەیاند: چاوەڕوانین وەزارەتی دارایی عێراق تەمویلی مووچە بکات، بەڵام دوای کاتژمێر 09:00 کە سیستمی بانکی دەکرێتەوە، دەردەکەوێت ئایا تەمویل کراوە یان نا.

سەرچاوەکەی وەزارەتی دارایی و ئابووری دەڵێت: هەموو ئامادەکارییەک کراوە، کە تەمویل کرا، ئێمە نووسراو دەبەینە بانک و پارەکە وەردەگرین، دواتر بۆ بانکە حکومییەکانی خۆمانی دەگوازینەوە، ئەمڕۆش فریای دابەشکردنی مووچە ناکەوین، بەڵام سبەی دەست بە دابەشکردنی مووچە دەکەین.

لەلایەکی دیکە: سەرچاوەیەكیش لە لقی هەولێری بانكی ناوەندیی عێراقی بە ئاڤای ڕاگەیاند، پارەی پێویست لەبەردەستە و كە پارەكە خرایە سەر هەژماری وەزارەتی دارایی هەرێمی كوردستان، بەشێكی دەگواسترێتەوە بۆ بانكی منارە لە هەولێر و بەشێكی دیكەیشی دەگواسترێتەوە بانكی ئاشتی لە سلێمانی، هاوكات بەشێكی دیكەیشی دەمێنێتەوە تایبەتە بە ئەو مووچەخۆرانەی كە لەڕێگەی هەژماری منەوە مووچە وەردەگرن.