لە ئێران دەستڕێژی گوللە لە دوو کورد دەکرێت

ئاڤا نیوز

 

لە شاری کەرەجی ڕۆژهەڵاتی کوردستان لەلایەن هێزەکانی ئێرانەوە دەستڕێژی گولـلە لە دوو کورد کرا و بەهۆیەوە یەکێکیان گیانی لەدەست دا و هاووڵاتییەکەی دیکە برینداربووە.

 

چیرۆکی سەرەکی: ڕێكخراوی هه‌نگاو بۆ مافەکانی مرۆڤ بڵاوی کردەوە، لە شارۆچکەی وەحدەتی کەرەجی ئێران دوو هاووڵاتیی كورد كه‌ له‌ناو ئۆتۆمبێلێكدا بوون دراونەتە‌ به‌ر ده‌ستڕێژی گوللـه‌، له‌ئه‌نجامدا یه‌كێكیان گیانی لەدەست دا و هاووڵاتییەکەی دیكه‌ش به‌سه‌ختی برینداربووە.

زانیاریی زیاتر: ئەو هاووڵاتییەی گیانی لەدەست داوە ناوی سەهەند کارگەرە، تەمەنی 25 ساڵە، کەسی دووەمیش ناوی پەیمانە و لە خزمەکانی سەهەند بووە، سێ گولـلەی بەرکەوتووە و بەسەختی برینداربووە و ئێستا لەژێر چاودێری پزیشکیدایە.

 

ئەوەی لەبارەیەوە دەگوترێت: "هێزەکانی ئێران بە گومانی هەڵگرتنی ماددەی هۆشبەر تەقەیان لە ئۆتۆمبێلی ئەو دوو هاووڵاتییە کوردە کردووە"، بەڵام تاوەکو ئێستا بەفەرمی ئەوە نەسەلمێنراوە و هیچ ڕوونکردنەوەیەکیش لەمبارەیەوە لەلایەن دەزگا ئەمنییەکانی ئەو وڵاتەوە نەدراوە.