پەیامێک لە هەژمارەی منەوە لەبارەی دابەشکردنی مووچە

ئاڤا نیوز

تیمی هەژماری من لەبارەی گرفتێکەوە دڵنیایی دەدات بە مووچەخۆران و ڕایدەگەیەنێت: نیگەران مەبن لە نەمانی پارە چونکە ئامێراکانی ڕاکێشانی پارە ڕاستەوخۆ پارەیان بۆ دابین دەکرێت. 

وێنە گەورەکە: ئەمڕۆ پێنج شەممە، وەزارەتی دارایی و ئابووریی لەگەڵ ڕاگەیاندنی لیستی مووچەی مانگی پێنج باسی لەوەشکرد کە وەزارەتەکە لەماوەی سێ ڕۆژدا کۆتایی بە دابەشکردنی مووچە دەهێنێت و هەژماری منیش لەماوەی دوو ڕۆژدا مووچەی سەرجەم هاوبەشانی دابەش دەکات. 

ژمارەکان وادەڵێن: هەر ئەم مانگە 401 هەزار مووچەخۆر لە ڕێگەی هەژماری منەوە مووچەیان وەردەگرن، بە گوێرەی دواین ئاماریش تاوەکو ئێستا نزیکەی 900 هەزار کەس خۆیان لەو پڕۆژەیە تۆمارکردووە و 500 هەزاریان ئێستا خاوەن کارتی بانکین، کە دەتوانن سوودمەندبن لە 580 ئامێری ڕاکێشانی پارە لە 200 شوێنی جیاواز. 

ژمارەی مووچەخۆرانی بەشدار لەو پڕۆژەیە بەم شێوەیە دابەش بوون بەسەر پارێزگاکان:

240 هەزار مووچەخۆر لە پارێزگای هەولێر، زیاتر لە 125 هەزار مووچەخۆر لە دهۆک، نزیکە 36 هەزار کەسیش لە سلێمانی. 

هەر لەگەڵ ئەوەشدا ئێستا 8 هەزار خانەنشینین هەر لە ڕێگەی ئامێرەکانی ڕاکێشانی پارەوە مووچەکانیان وەردەگرن. 

لێدوانی فەرمی: تیمی هەژماری من لەوبارەیەوە بە ئاڤای ڕاگەیاند: دابەشکردنی مووچەخۆران ماوەی دوو ڕۆژ دەخایەنێت، هاوکات مووچەخۆران نیگەران نەبن لە نەمانی پارە چونکە ڕاستەخۆی پارەیان بۆ دابین دەکرێتەوە لە هەر کاتێکدا بێت. 

- دەیان تیم لە سەرجەم ناوچەکان چاودێری ئامێرەکانی ڕاکێشانی پارە دەکەن و لەکاتی نەمانی پڕی دەکەنەوە. 

- ئەو کەسانەی شارەزای بەکارهێنانی ئامێرەکە نین و یاخود خانەنشینن، دەتوانن دوای کاتژمێر چواری ئێوارە تاوەکو دوانزەی شەو بڕۆن بۆ ڕاکێشانی پارەکانیان، لەوکاتەدا لەلایەن تیمی هەژماری منەوە هاوکاری دەکرێن.