پارتى: هەوڵ دەدرێت لە پارێزگای نەینەوا کەمترین پۆستی کارگێڕی بە ئێمە بدرێت

ئاڤا نیوز

بڕیارە لە چەند ڕۆژی داهاتوودا پۆستە کارگێڕییەکانی پارێزگای نەینەوا دابەش بکرێن و پارتیش دەڵێت، دژایەتییان دەکرێت و هەوڵێک هەیە کەمترین پۆستی کارگێڕییان پێ بدرێت.

 

وێنە گەورەکە: دوای تێپەڕبوونی زیاتر لە سێ مانگ بەسەر هەڵبژاردنی ئەنجوومەنی پارێزگاکانی عێراق، دانانی پارێزگار و جێگرەکانی لە نەینەوا ئێستا کار دەکرێت بۆ ئەوەی پۆستە کارگێڕییەکان بەسەر لایەنەکاندا دابەش بکرێت.

 

لێدوانی فەرمی: ئەحمەد دووبەردانی، ئەندامی ئەنجوومەنی پارێزگای نەینەوا بە ئاڤا نیوزی ڕاگەیاند: لایەنەکانی نەینەوای سەربەخۆ و چوارچێوەی هەماهەنگی لە ئەنجوومەنی پارێزگای نەینەوا دژایەتی پارتی دەکەن و لە هەوڵدان کەمترین پۆستی کارگێڕیمان پێ بدرێت، چونکە دەزانن پارتی خاوەن پێگە و هێزە لە عێراق.

 

زانیاریی زیاتر: پارتی چاوی لە پۆستە گرنگەکانی پارێزگای نەینەوایە، دواتر لەلایەن سەرکردایەتیی پارتییەوە بڕیار دەدرێت، کار بۆ کامە لەو پۆستانە بکرێت، تاوەکو وەریبگرن.

 

ئەوەی پێویستە بیزانیت: پێشتر مەناف حەسەن، بەرپرسی نووسینگەی ھەڵبژاردنەکانی پارتی لە نەینەوا بە ئاڤا نیوزی گوتبوو، "پارتی لە هەموو لایەکەوە دژایەتی دەکرێت". 

 

بۆچی گرنگە: پارتی لە شێوازی ئەو مامەڵەیەی لە ئەنجوومەنی پارێزگای نەینەوا لەگەڵیدا دەکرێت نیگەرانە و پێی وایە درێژەپێدەری ئەو هەڵمەتەیە کە لە بەغدا دژی حیزبەکە دەستپێکراوە.