فوئاد حسێن: مووچه‌ی مانگی سێی مووچەخۆرانی هەرێمی کوردستان دەنێردرێت

ئاڤا نیوز 

وه‌زیری ده‌ره‌وه‌ی عێراق ده‌ڵێت،  تاوەکو ئێستا گرفته‌كان له‌باره‌ی مووچه‌ی مووچه‌خۆران له‌نێوان حكومه‌تی فیدراڵ و حكومه‌تی هه‌رێمی كوردستان چاره‌سه‌ر نه‌كراون، به‌ڵام بزانین ڕۆژانی داهاتوو چۆن دەبێت.

 

لێدوانی فه‌رمی: فوئاد حوسێن، جێگری سه‌رۆکوه‌زیران و وه‌زیری ده‌ره‌وه‌ی عێراق لەبارەی مووچەی مووچەخۆرانی هەرێمی کوردستان ده‌ڵێت:

• هەرچەندە تاوەکو ئێستاش گرفتەکان چارەسەر نەکراون، بەڵام پێشبینی دەکرێت لە ڕۆژانی داهاتوو چارەسەر بکرێن.

• ئەوەی من لە محەممەد شیاع سوودانی، سەرۆکوەزیرانی عێراق تێگەیشتووم، هیچ گرفتێک نییە و مووچەی مانگی ئاداریش دەنێردرێت.

 

لەلایەکی دیکەوە: لەبارەی سەردانی ئەمجارەی شاندی باڵای حکومەتی عێراق بە سەرۆکایەتیی سوودانی بۆ واشنتن، وەزیری دەرەوەی عێراق گوتی: له‌ واشنتن پرسی چارەسەرکردنی کێشەی هەناردەکردنەوەی نەوتی هەرێمی کوردستان باس دەکرێت، کۆمپانیاكانی بەرهەمهێنەری نەوتی ئەمریکی له‌ هه‌رێمی كوردستان، گرفتەکانی خۆیان لەگەڵ کۆنگرێس و ئیدارەی ئەمریکا باس کردووە، بڕیارە له‌سه‌ردانەکەی شاندی باڵای حکومەتی عێراق بۆ ئەمریکا گفتوگۆی له‌باره‌یه‌وه‌ بکرێت. 

 

ئەوەی پێویستە بیزانیت: شاندەکە ئەندامانی کوردیشی تێدا دەبێت و ناوەڕۆکی گفتۆگۆکانیش لە سەردانەکانی پێشتر جیاوازترە و چەند پرسێکی دیکە بۆ باسکردن هەن، بەڵام ئەو پرسانەی پەیوەندییان بە بانک و دۆلار و دینارەوە هەیە باس دەکرێن.