ڕاوێژکاری دارایی سوودانی: لە بودجەی ساڵی 2026 داهاتی نانەوتی زیاتر دەکرێت

ئاڤا نیوز

 

ڕاوێژکاری سەرۆکوەزیرانی عێراق بۆ کاروباری ئابووری دەڵێت، لەئێستادا کار لەسەر ئامادەکردنی ڕەشنووسی بودجەی ساڵی 2026 دەکرێت، ئەویش بەجۆرێک دەبێت کە داهاتە نانەوتییەکان زیاتر دەکرێن و خەرجییەکانیش کۆنتڕۆڵ دەکرێن.

 

وێنە گەورەکە: یەکێک لە ئاستەنگییەکانی بەردەم بودجەی ساڵانەی عێراق پشتبەستنییەتی بە فرۆشتنی نەوت بە ڕێژەی نزیکەی 90%، ئەوەش وادەکات بەبەردەوامی دۆخی دارایی عێراق بە هەڵبەز و دابەزی بەهای نەوت بکەوێتە دۆخی شڵەژان و قەیرانەوە، بەجۆرێک هەندێکجار بۆ دابینکردنی مووچەش گرفتی بۆ دروستبووە، وەک شارەزایانیش دەڵێن، فرەجۆرکردنی سەرچاوەکانی داهات تاکە چارەسەری ئەم کێشەیەیە.

 

لێدوانی فەرمی: مەزهەر محەممەد ساڵح، ڕاوێژکاری سەرۆکوەزیرانی عێراق بۆ کاروباری ئابووری ڕایگەیاند، بەگوێرەی یاسای بەڕێوەبردنی دارایی، پێویستە ئێستا دەسەڵاتی دارایی بە هەماهەنگی لەگەڵ وەزارەتی پلاندانان دەست بە ئامادەکاری بۆ بودجەی ساڵی 2026 بکات، تا مانگی ئەیلولی ئەمساڵ بخرێتە بەردەم ئەنجوومەنی وەزاری بۆ ئابووریی و دواتریش ئەنجوومەنی وەزیران، پاشانیش بۆ پەرلەمان دەنێردرێت.

 

ئەوەشی خستووەتەڕوو، ڕەشنووسی بودجەی 2026 لەسەر بنەمای وردی و بەهێزکردنی توانای حکومەت بۆ هێشتنەوەی چالاکیی ئابووری ئامادە دەکرێت، تیایدا بەردەوامی پشتیووانی حکومەت بۆ جێبەجێکردنی سیاسەتە داراییەکان فراوان دەکرێت، ئەویش لەڕێگەی زیادکردنی داهاتە نانەوتییەکان و دانانی ڕێکاری توند بۆ کۆنتڕۆڵکردنی خەرجییەکان، ئەوەش لەڕێگەی بەئەلیکترۆنیکردنی کاروبارە داراییەکان و ڕێکخستن و پارێزگاریکردن لە یەک خەزێنەی یەکگرتوویی دارایی بەدیدەهێنرێت.