لیستی مووچەی مانگی حەوت بۆ وەزارەتی دارایی عێراق دەنێردرێت

ئاڤا نیوز

وەزارەتی دارایی هەرێمی کوردستان سەرقاڵی وردبینی کۆتاییە بۆ لیستی مووچەی مانگی حەوت و لەم هەفتەیە ڕەوانەی وەزارەتی دارایی عێراق دەکرێت، بۆ لیستی مووچەی ئەو مانگە ڕەچاوی لێبڕینی 3٪ـی خانەنشینی دەکرێت.

وێنە گەورەکە: حکومەتی هەرێمی کوردستان هەنگاوە کردەییەکانی بۆ خەرجکردنی مووچەی مانگی شەش دەستپێکردووە، بڕیارە لەم هەفتەیە نەوت و داهاتی نانەوتی بۆ مانگی شەش و لیستی مووچەی مانگی حەوت ڕادەست بکرێت.

لێدوانی فەرمی: سەرچاوەیەک لە وەزارەتی دارایی و ئابووری هەرێمی کوردستان بە ئاڤای گوت، "لیستی مووچەی مانگی حەوت تەواوبووە، یەک پێداچوونەوەی ماوە، سبەی یان دووسبەی ڕەوانەی وەزارەتی دارایی عێراق دەکرێت."

ئەمەش بزانە: بەگوێرەی بەدواداچوونی ئاڤا، دوای ئەوەی کۆتایی ئەم هەفتەیە پرۆسەی پێدانی نەوت بە سۆمۆ دەستپێدەکات، هەفتەی داهاتوو حکومەتی هەرێمی کوردستان لەگەڵ بەغدا دەست بە گفتوگۆ دەکات لەبارەی ناردنی مووچەی مانگی شەش.