دادگای فیدراڵی لەبارەی مووچەی مووچەخۆرانی هەرێمی کوردستان و پرۆژەی ڕووناکی بڕیاری دا

ئاڤا نیوز

دادگای باڵای فیدراڵیی عێراق لەبارەی دوو سکاڵا لەبارەی مووچەی مووچەخۆرانی هەرێمی کوردستان بڕیاری دا و دەڵێت، لە پسپۆڕی مندا نییە. هاوکات سکاڵای نەوەی نوێی دژی پرۆژەی ڕووناکی ڕەت کردەوە. 

چیرۆکی سەرەکی: دادگای باڵای فیدراڵیی عێراق بەگوێرەی خشتەی کارەکانی، ئەمڕۆ دادبینی بۆ چەند دۆسییەیەک کرد، لەنێویاندا سێ دۆسیە پەیوەندیان بە هەرێمی کوردستانەوە هەبوو.

ئەوەی پێویستە بیزانیت: دادگا دادبینی بۆ دوو سکاڵای هاوشێوە کرد کە لەلایەن چەند هاووڵاتییەکەوە دژی سەرۆکوەزیران و وەزیری دارایی حکومەتی فیدراڵی تۆمارکرابوون. داواکاریی سەرەکی لەم دوو سکاڵایەدا بریتی بوو لە پابەندکردنی بەغدا بە ناردنی مووچەی فەرمانبەران، خانەنشینان و شایستە داراییەکانی دیکەی هەرێم مانگانە لەکاتی خۆیدا، هاوکات جەخت لەسەر پێویستی جیاکردنەوەی پرسی مووچە لە ناکۆکی و ڕێککەوتنە سیاسییەکانی نێوان هەولێر و بەغدا کرابووەوە. لەو بارەیەوە دادگا بڕیاریدا کە ئەو بابەتە لە پسپۆریی ئەودا نییە.

لەلایەکی دیکەوە: سکاڵایەکی دیکە کە لەلایەن سروە عەبدولواحید، ئەندامی ئەنجوومەنی نوێنەران، دژی سەرۆکی هەرێم و سەرۆکی ئەنجوومەنی وەزیران تۆمار کرابوو، کە داواکرابوو بڕیاری حکومەت بۆ جێبەجێکردنی "پرۆژەی ڕووناکی" هەڵبوەشێنێتەوە. لەوبارەیەوە دادگا داواکەی ڕەتکردەوە.