کەشناسی: پلەکانی گەرما بە بەرزی دەمێننەوە

ئاڤا نیوز

دەستەی کەشناسی عێراق دەڵێت، لە ئەمڕۆوە تا شەممەی داهاتوو پلەکانی گەرما لە پارێزگاکانی هەرێمی کوردستان و عێراق بەبەرزی دەمێننەوە، ئەمڕۆش لە بەغدا و نۆ پارێزگای دیکەی وڵات پلەکانی گەرما لە نیوەی پلەی کوڵان نزیک دەبنەوە.

وێنە گەورەکە: یەکشەممەی ڕابردوو (27ی تەممووز) بەرزبوونەوەی پلەکانی گەرما لە عێراق گەیشتە لووتکە و وەک ڕێکارێکی خۆپارێزیش، لە زۆربەی پارێزگاکانی ناوەڕاست و باشوور ئەو ڕۆژەیان کردە پشوو، پارێزگاکانی دیکەش کاتژمێرەکانی دەوامی فەرمانبەرانیان کەمکردەوە.

ڕاگەیێنراوی فەرمی: دەستەی کەشناسی عێراق بڵاویکردەوە، ئەمڕۆ سێشەممە پلەکانی گەرما لە پارێزگاکانی عێراق و هەرێمی کوردستان هەر بە بەرزی دەمێننەوە، هاوکات ڕۆژانی چوارشەممە، پێنجشەممە، هەینی و شەممەی داهاتووش گۆڕانکارییەکی سنووردار لە پلەکانی گەرما ڕوودەدات، لە بەرامبەریشدا سەرەتای هەفتەی داهاتوو خێرایی با بۆ 30 کیلۆمەتر لە کاتژمێرێکدا بەرزدەبێتەوە.

لەلایەکی دیکەوە: شێخ دارا، شارەزا و پێشکەشکاری کەشوهەوای ئاڤا لە گەشتی هەواڵەکانی کاتژمێر 07:00ی ئێوارەی دوێنێ ڕایگەیاند، هاوکات لەگەڵ بەبەرزی مانەوەی پلەکانی گەرما، لە پارێزگاکانی باشوور و ڕۆژئاوای عێراقیش شەپۆلێکی خۆڵبارین هەیە و بەردەوامیش دەبێت، ئەوەش کاریگەری خراپی هەیە بەهۆی ئەوەی تائێستا حکومەتی فیدڕاڵ هەوڵی چارەسەرکردنی کێشەکانی ئاو و ژینگەی نەداوە.