لە هەولێر پڕۆژەی "زبڵەکان جیابکەرەوە و ژینگە بپارێزە" ڕاگەیێنرا

ئاڤا نیوز

لە هەولێر پڕۆژەیەکی ژینگەیی لەلایەن دامەزراوەی کوردستان فاوندەیشن بە هەماهەنگی لەگەڵ شارەوانی ڕاگەیێنرا، مەبەست لێی هاندانی هاووڵاتیانە بۆ پاک ڕاگرتنی ژینگە.

چیرۆکی سەرەکی: دامەزراوەی کوردستان فاوەندەیشن، لە هەنگاوێکی نوێی ژینگەییدا و بە هەماهەنگی لەگەڵ سەرۆکایەتیی شارەوانیی هەولێر، پڕۆژەیەکی گرنگی بە ناونیشانی "زبڵەکان جیابکەرەوە و ژینگە بپارێزە" لە شاری هەولێر ڕاگەیاند. لە قۆناغی یەکەمدا، 350 سەتڵی تایبەت بە جیاکردنەوەی پاشماوەکان لە سەنتەری شاردا دانراون، بە ئامانجی هاندانی هاووڵاتییان بۆ دووبارە بەکارهێنانەوەی ماددەکان و پاراستنی ژینگە.

لێدوانی فەرمی: کارزان هادی، سەرۆکی شارەوانیی هەولێر، بە ئاڤای وت، ئەم پڕۆژەیە هەنگاوێکی گرنگە بۆ بڵاوکردنەوەی فەرهەنگی جیاکردنەوەی پاشماوەکان. وتیشی، ئەم سەتڵانە بۆ جیاکردنەوەی خۆڵ و خاشاکە لە یەکتر، ئامانجەکە ئەوەیە ئەو پاشماوانەی بە کەڵک دێن دووبارە بەکاربهێنرێنەوە."کار لەسەر بەرزکردنەوەی ئاستی هۆشیاریی خەڵکیش دەکرێت بۆ دانان و جیاکردنەوەی زبڵ و پاشماوەکان."

زانیاریی زیاتر: سەرۆکی شارەوانیی هەولێر باسی لە زیانە ژینگەییەکانی شێوازی پێشووی فڕێدانی پاشماوەکان کرد و وتی: "پێشووتر ناچار بووین پلاستیک بخەینە ژێر زەوی، کە سەدان ساڵی پێویستە تا شی دەبێتەوە، بەڵام دامەزراوەی کوردستان فاوەندەیشن ئەم ئەرکە گەورە ژینگەییەی لە ئەستۆ گرت."

ئەوەی پێویستە بیزانیت: ئەم سەتڵانە تایبەت کراون بە کۆکردنەوەی ئەو پاشماوانەی کە توانای دووبارە بەکارهێنانەوەیان هەیە، وەک پلاستیک، شووشەی خواردنەوە گازییەکان، و هەر کەرەستەیەکی دیکەی هاوشێوە. ئامانجی سەرەکیی پڕۆژەکە ڕێگریکردنە لە تێکەڵبوونی ئەم ماددانە لەگەڵ پاشماوەکانی تردا، تا بتوانرێت سوودیان لێ وەربگیرێتەوە لە پرۆسەی ڕیسایکلین (دووبارە خستنەوەگەڕ).

پڕۆژەکە تەنیا بەم قۆناغە کۆتایی نایەت، بڕیارە لە داهاتوویەکی نزیکدا فراوانتر بکرێت و ئەم جۆرە سەتڵانە لە سەرجەم گەڕەک و کۆڵانەکانی شاری هەولێر دابنرێن، تا فەرهەنگی جیاکردنەوەی زبڵ لەسەرچاوەوە ببێتە بەشێک لە ژیانی ڕۆژانەی هاووڵاتییان.