لە دهۆک دوو کەس هەوڵدەدەن بەهۆی لافاو فێڵ لە حکومەت بکەن

ئاڤا نیوز

 

پرۆسەی تۆمارکردنی ئۆتۆمبێلە زیان بەرکەوتووەکانی دهۆک کۆتاییهات؛ پەیامنێری ئاڤا نیوز گوتی، دوو کەس ویستوویانە بە فێڵ ئۆتۆمبێلەکانیان تۆمار بکەن هەرچەندە زیانیان بەرنەکەوتبوو، بەڵام لیژنەکە پێیانزانیوە و دەریانکردوون.

 

چیرۆکی سەرەکی: ڕۆژی 19ـی ئەم مانگە بارانبارینێکی چڕ سەنتەری شاری دهۆکی گرتەوە، لافاو لە بەشێکی گەڕەک و کۆڵانەکانی شارەکە دروستبوو، بەهۆیەوەش سەدان ئۆتۆمبێل و خانوو زیانیان بەرکەوت.

 

زانیاریی بەدەستهاتوو: نیهاد حسێن، پەیامنێری ئاڤا نیوز لە گۆڕەپانی ئۆتۆمبێلە زیانبەرکەوتووەکان ئامادە بوو، لەبارەی پرۆسەکەوە گوتی: "لیژنەی قەرەبووکردنەوەی حکومەت چەندین ڕۆژ سەرقاڵی تۆمارکردنی ئۆتۆمبێلەکان بوو، بەڵام دوو کەس ویستیان بە فێڵ ئۆتۆمبێلەکانیان تۆمار بکەن لەکاتێکدا بە لافاوەکە زیانیان بەرنەکەوتبوو". 

 

ئەوەی پێویستە بیزانیت: بەپێی کۆتا ئاماری لیژنەی قەرەبووەکە 182 ئۆتۆمبێل وەک زیانبەرکەوتووی لافاوەکە تۆمارکراون، 37ـشیان بەیەکجاری لەکارکەوتوون و بڕیارە لە زووترین کاتدا قەرەبوو بکرێنەوە.