نووسینگەكانی ئاڵوگۆڕی دراو لە هەرێمی كوردستان ڕێكدەخرێنەوە

ئاڤا نیوز

كۆمپانیا و نووسینگەكانی ئاڵوگۆڕی دراو لە هەرێمی كوردستان بەردەوام دەبن لە كار و چالاكییەكانی خۆیان تا ئەوكاتەی مۆڵەتەكانیان لە بانكی ناوەندیی عێراق تەواو دەبێت.

چیرۆکی سەرەکی: بەمەبەستی چارەسەركردنی ئەو گرفتانەی ڕووبەڕووی خاوەن كۆمپانیاكان و وەبەرهێنەران دەبێتەوە، ئێوارەی ڕۆژی دووشەممە 3ـی ئابی 2025، بەڕێوەبەری گشتیی تۆماركردنی كۆمپانیاكان، سەردانی پارێزگاری بانكی ناوەندیی عێراقی كرد، باس لە هەماهەنگی نێوان هەردوو حكومەتی هەرێمی كوردستان و حكومەتی فیدراڵ كرا بۆ چارەسەریی ئەو گرفتانەی ڕووبەڕووی خاوەن كۆمپانیاكان و وەبەرهێنەران دەبێتەوە.

لێدوانی فەرمی: بڵند محەممەد مەم، بەڕێوەبەری گشتیی تۆماركردنی كۆمپانیاكان ڕایگەیاند، پارێزگاری بانكی ناوەندی ڕەزامەندی دا لەسەر بەردەوامیدان بە كار و چالاكییەكانی كۆمپانیاكانی ئاڵوگۆڕی دراو كە گشت پێداویستییەكانی تێكەڵكردنەوە (دەمج)ـیان تەواوكردووە تا ئەوكاتەی مۆڵەتەكانیان لە بانكی ناوەندی عێراق تەواو دەبێت.

زانیاریی زیاتر: نووسینگەکانی ئاڵوگۆڕی دراو لە هەرێمی کوردستان، ئەوانەی پێش ساڵی 2018 تۆماركراون، سەرژمێر دەکرێن و بەرژەوەندی خاوەن نووسینگەكان لەبەرچاو دەگیرێت، بۆ ئەم مەبەستەش پیشنیازکرا لیژنەیەک لە هەردوو لقی هەولێر و سلێمانیی بانکی ناوەندی هەرێمی کوردستان پێکبهێندرێت بۆ پشکنینی شوێنی نووسینگەکان.

ئەمەش بزانە: لە دیدارەكەدا هەریەك لە كازم مەغدید، بەڕێوەبەری تۆماركردنی كۆمپانیا نیشتمانییەكانی عێراق و د. هاوڕێ کەمال، ڕاوێژکاری وەزارەتی دارایی و ئابووری حکومەتی هەرێمی کوردستان، بەختیار حاجی حەمەد، بەڕێوەبەری گشتیی لە نوێنەرایەتی حكومەتی هەرێمی كوردستان لە بەغدا ئامادەبوون.