لەسەر مانگایەکی مردار بوو دووکەس لە سەنگەر دەستگیرکران

ئاڤا نیوز

لەکاتی تێپەڕینی ئۆتۆمبیلێکی بچووکی نەفەرهەڵگر لە بازگەی دەروەکۆتر لەناحیەی سەنگەسەر، دەست بەسەر مانگایەکی مرداربوودا دەگیرێت کە هەوڵدراوە لەبازاڕدا ساغی بکەنەوە.

چیرۆکی سەرەکی: لەکاتی لەوەڕاندنی ئاژەڵدا لەنزیک گوندی باراوا لەسنوری ناحیەی سەنگەسەر، مانگایەک لەشاخ هەڵدێراوە و خاوەنەکەی هەوڵیداوە بە پشتی ئۆتۆمبیلێکی بچووکی جۆری تایبەت بیگوازێتەوە بۆ سەنگەسەر، بەڵام لەبازگەی دەروەکۆتر لەدوای پشکنینی ئۆتۆمبیلەکەیان ،خاوەنی مانگاکەو شۆفێرەکە دەستگیردەکرێن.

ڕاگەیێنراوی فەرمی: هۆبەی ئابووری ئاسایشی ڕاپەڕین بەهاوکاری یاریدەدەریەتی ئاسایشی سەنگەسەر، بڵاوی کردووەتەوە دوای ئاگادارکردنەوەی دکتۆری ڤێرتێرنەری سەنگەسەر و پشکنینی لەلایەن لیژنەی هاوبەشی ئاسایش و ڤێرتێرنەری دەرکەوت ئاژەڵەکە لەکاتی لەوەڕاندن هەڵدێراوەو مرداربووەتەوە، بەڵام خاوەنەکەی ویستویەتی سەری ببڕێت لەکاتی سەربڕینەکەشی تەنیا سەرپێستیان بڕی بوو چەقۆکە بەتەواوی نەگەیشتبووەتە ملی مانگاکە و بەگوێرەی ڕێنمایی تەندروستی بەسەربڕین هەژمارناکرێت، بۆیە لیژنەکە بڕیاری لە ناوبردنی سەر ئاژەلەکەیداو دووکەسەکەشی دەستگیرکردوە.

لێدوانی فەرمی : دکتۆر هێمن حەسەن ، بەرێوبەری هۆبەی ڤێرتێرنەری سەنگەسەر، بەئاڤای ڕاگەیاند، "دوو لە پزیشکانی ڤێرتێرنەری پشکنیان بۆ مانگاکە کردووە، بەپێی پشکنینەکان دەرکەوتووە دوو کاتژمێر بووە مانگاکە مردار بووەتەوە، بۆیە شیاوی خواردن نەبووە و لەناو براوە.

زانیاریی زیاتر: لە ئێستادا ئەم دووکەسە بەپێی مادەی 240 و لەدادگای لێکۆڵینەوەی بەڕێوەبەرایەتی ئاسایشی ڕاپەڕین دەستگیرکراون،  لێکۆلینەوە لەگەڵیاندا بەردەوامە.