ئاگرەکەی ناڵپارێز کۆنترۆڵکرا؛ گومان لە کەسێک دەکرێت

ئاڤا نیوز

دوای ئەوەی ئاگر لە سنووری ناحیەی ناڵپارێز کەوتەوە، بەهۆی سەختی ناوچەکەوە توانرا دوای زیاتر لە 13 کاتژمێر ئاگرەکە کۆنترۆڵ بکرێت.

چیرۆکی سەرەکی: ڕۆژی هەینی، ئاگر لە سنووری گوندەکانی 'هەرزەلە، سەرکان، گەوڕان، گەڵوز'ـی سەربە ناحیەی ناڵپارێز کەوتەوە، بەهۆی سەختی ناوچەکە ئاگرەکە زیاتر تەشەنەی سەند.

لێدوانی فەرمی: عەمید هێمن کەمەرخان، وتەبێژی بەڕێوەبەرایەتی پۆلیسی دارستان و ژینگەی سلێمانی بە ئاڤا میدیای ڕاگەیاند: بەهۆی سەختی ناوچەکە و مەترسی هەبوونی مین، کۆنتڕۆڵکردن و کوژاندنەوەی ئاگرەکە سەخت بوو.

وتەبێژی بەڕێوەبەرایەتی پۆلیسی دارستان و ژینگەی سلێمانی وتیشی: زیاتر لە هەزار دۆنم پووش و پاوان و دارستانی سروشتی سووتاون، بەڵام هیچ ئاژەڵ و باڵندەیەکی کێوی نەبینراون کە بەهۆی ئاگرەکەوە سووتابن.

زانیاریی زیاتر: بۆ کۆنتڕۆڵکردنی ئاگرەکە جگە لە تیمەکانی بنکەی پۆلیسی دارستان و ژینگەی ناڵپارێز، ژینگەدۆستانی ڕێکخراوی ملەکەوە و گوندنشینانیش لە کوژاندنەوەی ئاگرەکەدا بەشداربوون.

ئەوەی پێویستە بیزانیت: پەڕاوی لێکۆڵینەوە بۆ دۆزینەوەی هۆکاری سەرەکی ئاگرکەوتنەوەکە کراوەتەوە، بە فەرمانی دادوەری لێکۆڵینەوەش فەرمانی دەستگیکردن بۆ کەسێک دەرچووە کە گومان لێکراوە.