کەشناسی عێراق: شەپۆلێکی نوێی گەرما و خۆڵبارین بەڕێوەیە

ئاڤا نیوز

دەستەی کەشناسی عێراق دەڵێت، سبەی دووشەممە لە شەش پارێزگای عێراق پلەکانی گەرما دەگاتە نیوەی پلەی کوڵان ( 50 پلەی سیلیزی)، پێشبینیش دەکات، ئەم شەپۆلی گەرمایە خۆڵبارینیشی لەگەڵدا زیاد بکات.

لێدوانی فەرمی: شێخ دارا پێشکەشکاری کەشوهەوای ئاڤا لە گەشتی هەواڵەکانی کاتژمێر 7:00ی دوێنێ ئێوارەدا ئاشکرای کرد، کە شەپۆلی گەرما تا ناوەڕاستی ئەم مانگە بە بەرزی دەمێنێتەوە و دواتر پلەکانی گەرما بە قۆناغ ڕوو لە نزمبوونەوە دەکەن.

ڕاگەیێنراوی فەرمی: دەستەی کەشناسی عێراق بڵاویکردەوە، سبەی دووشەممە لە بەغدا، کەربەلا، نەجەف، بابل، زیقار و موسەننا پلەکانی گەرما 50 بۆ 51 پلە دەبێت، واست و دیوانییە 49 پلە، میسان، ئەنبار، دیالە و سەڵاحەددین 48 پلە، دهۆک و سلێمانی 43 پلە، هەولێر 45 پلە و نەینەواش 46 پلەی سیلیزی دەبێت.

ئەوەشی خستووەتەڕوو، پێشبینیی دەکرێت ڕۆژی چوارشەممەی داهاتوو لە ناوچەکانی ناوەڕاست و باشووری عێراق خێرایی با زیاد بکات، ئەوەش دەبێتە هۆی خۆڵبارین، پلەکانی گەرمای ڕۆژانی سێشەممە و چوارشەممەش لە پلەکانی گەرمای ڕۆژی دووشەممەوە نزیک دەبن.